Ադրբեջանում գրող Աքրամ Այլիսլիի «Քարե երազներ» գրքի առաջացրած հիստերիայից հետո սկսել են հետապնդել նրա ընտանիքին: Turan գործակալության հետ զրույցում Այլիսլին հաստատել է նախօրեին իր որդուն եւ կնոջը աշխատանքից հեռացնելու մասին լուրը: Նա վստահեցրել է, որ չի պատրաստվում երկրից հեռանալ:
Contact.az-ը հայտնում է, որ գրողի որդի, Հարկային ծառայության գնդապետ Նաջաֆ Նայիբովը (Այլիսլի), որը 12 տարի ղեկավարում էր Պետհարկային գերատեսչության ֆինանսական բաժինը, առանց պատճառաբանության հեռացվել է աշխատանքից: Գրողի կինը՝ Սաբայիլի շրջանում երկար տարիներ Նազիմ Հիքմեթի անվան մանկական գրադարանը ղեկավարած Գալինա Այլիսլին, նույնպես անսպասելի հեռացվել է աշխատանքից:
«Այդ ամենն արվում է իմ վրա ճնշում գործադրելու նպատակով, դա վրեժ է իմ գրած «Քարե երազներ» վեպի համար», - ասել է գրողը:
«Քարե երազները» եռերգության երկրորդ մասն է: Առաջին մասը՝ «Եմենը», գրվել էր դեռեւս 1990թ.: Եռերգության երրորդ մասը դեռ ձեռագիր վիճակում է, դրա բովանդակության մասին գրողը չի պատմում:
Հիշեցնենք, որ «Քարե երազները» մեծ աղմուկի եւ գրողին հայկական կողմնորոշման, հակաադրբեջանականության եւ այլնի մեջ մեղադրելու պատճառ էր դարձել: Բաքվում Այլիսլիի՝ երկիրը լքելու պահանջով բողոքի ցույցեր էին անցկացվել:
Contact.az-ը նշում է որ «գրքի էությունը մտավորականի մտորումներն են հայ-ադրբեջանական հիմնախնդրի եւ երկու ժողովուրդների հարաբերությունների վերաբերյալ»:
