Այսօր լրանում է 2008 թվականի մարտի 1-ին Երեւանի կենտրոնում տեղի ունեցած իրադարձությունների երկու տարին: Ուղիղ երկու տարի առաջ, այս օրը առավոտյան ժամը 6:30-ին ոստիկանությունը հարձակվեց Ազատության հրապարակում շուրջօրյա բողոքի ակցիա անցկացնող ցուցարարների վրա եւ ցրեց նրանց: Դրա արդյունքում հազարավոր ցուցարարներ հավաքվեցին Մյասնիկյանի արձանին հարող հրապարակում: Երեկոյան արդեն իշխանությունները ոտքի հանեցին բանակը, զենք կիրառեցին ցուցարարների նկատմամբ, որի արդյունքում սպանվեցին 10 քաղաքացիներ. Տիգրան Աբգարյանը, Տիգրան Խաչատրյանը, Գոռ Քլոյանը, Արմեն Ֆարմանյանը, Դավիթ Պետրոսյանը, Հովհաննես Հովհաննիսյանը, Սամվել Հարությունյանը, Զաքար Հովհաննիսյանը, Գրիգոր Գեւորգյանը, Համլետ Թադևոսյանը։ Բազմաթիվ մարդիկ վիրավորվեցին:
Նշենք, որ մինչ օրս բացահայտված չեն այդ սպանությունների հեղինակները, թեեւ հայտնի են հատուկ միջոցներ կիրառած 4 ոստիկանների անունները, որոնց կրակոցներից սպանվել են 10 զոհերից 3-ը: Իշխանությունները հայտարարում են, որ մարտի 1-ի էջն արդեն փակված է, իսկ ընդդիմությունն ու զոհերի հարազատները, հայտարարում են, որ քանի դեռ մեղավորները չեն բացահայտվել եւ չեն պատժվել, այդ էջը փակված համարել չի կարելի:
