Վրաստանի Ախալքալաքի շրջանում տեղի ունենալիք տեղական ինքնակառավարման մարմինների ընտրություններին մասնակցում են հինգ քաղաքական ուժեր, այդ թվում եւ իշխող «Ազգային միասնական շարժում» կուսակցությունը եւ Զուրաբ Նողաիդելիի ընդդիմադիր «Արդար Վրաստանի համար» բլոկը։ Այս մասին NEWS.am-ի թղթակցի հետ զրույցում հայտարարեց չգրանցված «Վիրք» կուսակցության համանախագահ Դավիթ Ռստաքյանը։
Նա նշեց, որ Նողաիդելիի ընդդիմադիր բլոկի ցուցակը ինքն է գլխավորում։ «Մենք բանակցություններ ենք վարել քաղաքական բոլոր ուժերի հետ, սակայն նրանցից ոչ մեկը չցանկացավ իր կազմի մեջ ներառել համարձակ հայացքների տեր մարդկանց։ Դրան համաձայնեց միայն Նողաիդելին»,- ասաց Ռստաքյանը։ Նա ընդգծեց, որ մնացած բոլոր ցուցակներում եւս գերակշռում են հայերը։ «Ցուցակներում վրացիներ գրեթե չկան։ Իսկ ինչո՞ւ, եթե իշխանությունները կարող են իրենց խնդիրները լուծել հայերի օգնությամբ։ Ո՞վ կարող է փչացնել հայի կյանքը, եթե ոչ ինքը՝ հայը։ Ոչ մի վրացի չի կարող անել դա, այդ պատճառով էլ իշխանությունները խուսափել են ցուցակների մեջ վրացիներ ներառելուց»,- նկատեց նա։ Ռստաքյանն ընդգծեց, որ նախընտրական իրավիճակը հանգիստ է։ Նա նաեւ կանխատեսեց, որ ընտրությունները չեն անցնի առանց վարչական միջամտության։ «Սակայն պետք է նշեմ, որ տեղական ինքնակառավարման մարմինները չեն կարող լուծել հայերի առջեւ ծառացած խնդիրները, դա պետք է արվի իշխանությունների կողմից։ Սակայն քանի դեռ Վրաստանում լեգիտիմ իշխանություն չի ձեւավորվել, ազգային փոքրամասնությունների խնդիրները չեն լուծվի»,- հայտարարեց Ռստաքյանը։
Նշենք, որ Վրաստանում տեղական ինքնակառավարման մարմինների ընտրությունները տեղի կունենան մայիսի 30-ին։
