Ադրբեջանցի դիվերսանտի կրակոցից հուլիսի 11-ի երեկոյան Սոթքի մոտ վիրավորված 37-ամյա Կարինե Դավթյանին այսօր՝ հուլիսի 21-ին, տեղափոխել են հիվանդասենյակ: Այս մասին NEWS.am-ի հետ զրույցում ասաց Կենտրոնական զինվորական հոսպիտալի պետ Արամ Ասատուրյանը:
«Բավականին լավ է վիճակը, ինքնուրույն քայլում է, նորմալ սնվում է, այսօր տեղափոխում ենք հիվանդասենյակ, որտեղ էլ բուժումը կշարունակի որոշ ժամանակ, իսկ հետո արդեն դուրս կգրվի»,- ասաց նա:
Արամ Ասատուրյանի խոսքով՝ ցավոք, 37-ամյա կնոջ տեսողությունը վերականգնել հնարավոր չէ. նրա մեկ աչքն ամբողջությամբ վնասված է:
Ավելի վաղ NEWS.am-ը հայտնել էր, որ ԼՂՀ եւ ՀՀ պետական սահմանահատվածում (Քարվաճառի ուղղություն) հակառակորդը հուլիսի 11-ին ձեռնարկել էր հերթական հետախուզադիվերսիոն ներթափանցման փորձը: Քարվաճառի տարածքում հակառակորդի դիվերսիոն խմբի չեզոքացման ժամանակ հայ զինծառայողները ոչնչացրել են մեկ դիվերսանտի: Փոխհրաձգության ժամանակ զոհվել է հայ սպա` 1972թ. ծնված մայոր Սարգիս Աբրահամյանը, վիրավորվել է 1977թ. ծնված Կարինե Դավթյանը:
