Ալյասկայի բնակիչը սպանել է գորշ արջին, որը մի քանի անգամ փորձել է իր տուն ներխուժել: Ջիմ Լենդեսը, ով բնակվում է Քենայի թերակղզու Սթերլինգ քաղաքում, 5-ամյա արու արջին սպանել է հուլիսի 7-ին: Միջադեպի ժամանակ Լենդեսը տանը որդու հետ է եղել:
Նա պատմել է, որ արջը հարվածում էր տան պատերին: Լենդեսը որդու հետ կարողացել է վախեցնել արջին՝ մի քանի անգամ օդ կրակելով, եւ գնացել քնելու: Սակայն 3 ժամ անց արջը վերադարձել է: Այս մասին գրում է Americaru.com-ը:
«Որդիս ներքեւում քնած էր, իսկ երբ արթնացել է, տեսել է, որ գորշ արջն իրեն է նայում ճաշասենյակի պատուհանից»,- Alaska Dispatch-ին պատմել է Լենդեսը՝ հավելելով, որ վերցրել է ատրճանակն ու յոթ անգամ կրակել արջին: «Ես չէի կարողանում հավատալ, որ նա վերադարձել է»,- ասել է ալյասկացին:
Իրավապահների փոխանցմամբ, Լենդեսը կատարել է օրենքով նախատեսված պահանջները եւ կենդանու մորթին ու գլուխը փոխանցել իշխանություններին՝ անհրաժեշտ փաստաթղթերը լրացնելու համար:
«Ես որսորդ չեմ, ես ձկնորս եմ: Դա այն չէր, ինչ ես ուզում էի անել: Ես ցանկանում էի վախեցնել նրան»,- ասել է Լենդեսը: