Ազգային մաքսադրույքներից Եվրասիական միության դրույքների անցումը գործնականում չի փոխի դեղամիջոցների գները Հայաստանում: NEWS.am-ի թղթակցի հետ զրույցում նման կարծիք է հայտնել «Ռիխտեր-Լամբրոն» (Հայաստանում «Գեդեոն Ռիխտեր» ընկերության ներկայացուցիչ) ընկերության տնօրեն Մանասե Եփրեմյանը: Նա նշել է, թե Ռուսաստանում «Գեդոն Ռիխտերի» դեղամիջոցներն արժեն նույնքան, որքան Հայաստանում, թեեւ բազմիցս ասվել է, որ Հայաստանում դեղերի ներկրման մաքսադրույքը զրոյական է, իսկ «եվրասիականի» անցման դեպքում դեղերը կարող են թանկանալ:

Համեմատության համար Եփրեմյանը ներկայացրել է երկու դեղամիջոցների գները՝ «Կավինտոն» (5մգ, 5 հաբ) եւ «Կվատամել» (29 մգ, 28 հաբ): Երեւանում այդ դեղամիջոցներն արժեն 2650 եւ 2050 դրամ համապատասխանաբար, իսկ Մոսկվայի «Ֆարմվիտա» դեղատանը 225 ռուբլի (2630 դրամ) եւ 150 ռուբլի (1750 դրամ) համապատասխանաբար: Այսինքն, որոշ դեպքերում Մոսկվայում դեղերի գներն ավելի էժան են:

Հաշվի առնելով փոխադրման նրբությունները՝ Եփրեմյանն առաջարկել է գները համեմատել Նովոսիբիրսկի հետ, որտեղ գները նույնն են եղել, ինչ Երեւանում:

«Ամեն ինչ աշխարհագրական մեկուսացվածության եւ մաքսատներում բեռների ձգձգման մեջ է: Ցանկացած ինտեգրում հանում է խոչընդոտները եւ պետք է ողջունել»,- ասել է նա: