Իսրայելի «Նոյան տապան» մշակութային կենտրոնը Իսրայելի եւ Պաղեստինի միջեւ ռազմական գործողությունների արդյունքում տուժած հայերի մասին տեղեկությունների չի տիրապետում: Այդ մասին NEWS.am-ի թղթակցի հետ զրույցի ընթացքում հայտարարել է Իսրայելի «Նոյան տապան» մշակութային կենտրոնի մամուլի քարտուղար Մենդել Կորսունսկին:
Ինչ վերաբերում է երկրի հայ համայնքի կյանքին, ապա Կորսունսկիի խոսքով, Իսրայելում հայկական մշակույթի «Նոյան Տապան» կենտրոնը միշտ բաց է հայերի եւ նրանց ընտանիքի անդամների համար. «Կոչ եմ անում Իսրայելում բնակվող բոլոր հայերին, դժվար կացության մեջ հայտնվելիս, դիմել մեզ, քանի որ այդ պահերին երբեմն օգնում է զրուցել եւ կիսվել մեր խնդիրներով: Ցանկացողների համար հրապարակում եմ մեր կենտրոնի էջը ֆեյսբուք սեցիալական ցանցում»:
Ի պատասխան հարցին՝ հայ համայնքից քանի՞ մարդ է լքել երկիրը, Կորսունսկին նշել է, որ նման միտում չկա. «Երկրի հայ համայնքի շրջանում ես նման միտում չեմ նկատում: Ես անձամբ եմ ծանոթ ընտանիքների հետ, ովքեր ամառային արձակուրդների ընթացքում հանգստացել են հայրենիքում եւ վերադարձել Իսրայել ու չեն փոխել իրենց ծրագրերը՝ չնայած Իսրայելում առկա իրավիճակին»:
Անդրադառնալով ընդհանուր իրավիճակին, Կորսունսկին ասել է. «Ցավոք, կործանման իրական անհանգստությունը, երեխաների համար վախը, քաղաքացիների շրջանում կորուստները մեզ համար սովորական պատկեր են դարձել: Մենք դեռ հույս ունենք, որ ռազմական գործողությունները շուտով կավարտվեն եւ թշնամական կողմերը կարող են հաշտեցման եզրեր գտնել, ինչը կկասեցնի սահմանի երկու կողմում սպանվածների եւ վիրավորների մասին վիճակագրությունը»:
Հիշեցնենք, որ Հուլիսի 8-ին Իսրայելի պաշտպանության բանակը Գազայի հատվածում հայտարարել էր ՀԱՄԱՍ խմբավորման զինյալների դեմ «Անպարտելի ժայռ» գործողության մասին: Վարչապետ Բենյամին Նեթանյահուի խոսքով՝ Իսրայելը նման քայլի է դիմել «բոլոր այլ հնարավորությունները սպառվելուց հետո»: