Հայաստանի կառավարությունն ու ժողովուրդը վերջին 10 տարիներին զգալի աճ են արձանագրել թրաֆիքինգի դեմ պայքարում: Այս մասին հուլիսի 30-ին՝ Թրաֆիքինգի դեմ պայքարի համաշխարհային օրը կայացած ասուլիսում հայտարարել է ՄԱԿ-ի Զարգացման ծրագրի հայաստանյան մշտական ներկայացուցիչ Բրեդլի Բուզետտոն:
Նրա խոսքով, ամբողջ աշխարհում աշխատանք է տարվում՝ այդ սարսափելի երեւույթի մասին մարդկանց տեղեկացվածությունը բարձրացնելու համար: «Ինձ համար թրաֆիքինգն ամենասարսափելի հանցագործությունն է: Թրաֆիքինգ իրականացնողները մարդկանց զրկում են հույսից: Մի կողմից՝ այդ սարսափելի խնդիր է, որը խորանում է ամբողջ աշխարհում: Մյուս կողմից՝ Հայաստանի դեպքում դրական տեղաշարժեր են նկատվում երեք հիմնական ուղղություններով. օրենսդրության ընդունման ուղղությամբ աշխատանքներ, գործող իրավական ակտերի իրագործում, դպրոցներում եւ կրթական այլ հաստատություններում համապատասխան նյութերի տարածում՝ տեղեկացվածության մակարդակը բարձրացնելու նպատակով»,- նշել է Բուզետտոն:
Նա նաեւ ընդգծել է, որ Հայաստանը հասել է նրան, որ հայտնվել է թրաֆիքինգի դեմ պայքարող երկրների առաջին խմբում:
