Ախալքալաքում վրացական ռազմաբազայի տեղակայումը նպատակաուղղված է Վրաստանի ներքին խնդրիրների լուծմանը՝ թեեւ սովորաբար, բանակը արտաքին խնդիրներն է լուծում: Այդ մասին NEWS.am-ի թղթակցի հետ զրույցի ընթացքում հայտարարեց Վրաստանում չգրանցված «Վիրք» կուսակցության նախագահ Դավիթ Ռստակյանը՝ հավելելով, որ այդ մասին բացահայտ չի խոսվում:
Նրա խոսքով՝ ջավախահայությունը Վրաստանի իշխանությունների հետ խնդիրներ ունի. «Նախկին ռուսական ռազմաբազայի փոխարինումը վրացականվ վտանգավոր է, քանի որ այսօր մեր խնդիրները հենց Վրաստանի իշխանությունների հետ են, Վրաստան պետության շրջանակներում: Ես դեռ այն ժամանակ եմ ասել, որ Ախալքալաքում վրացական ռամաբազայի տեղակայումը ճիշտ չէ», - անհանգստություն հայտնեց ջավախեցի քաղաքական գործիչը: Ռստակյանն ընդգծեց, որ ապագայում Սամցխե-Ջավախեթիում տեղակայված բազան Ջավաքխի հայության իրավունքների համար պայքարի տեսակետից բացասական ազդեցություն կունենա: «Այսօրվա դրությամբ Վրաստանը փայլուն հարաբերություններ ունի Թուրքիայի հետ, հայ-վրացական հարաբերությունները, ինչպես ներկայացվում է, բարեկամական մակարդակի վրա են: Հարց է ծագում՝ այդ երկու պետությունների հարեւանությամբ բանակի տեղակայման իմաստն ու նպատակը ո՞րն է», - ընդգծեց նա:
Հիշեցնենք, որ գլխավորապես հայերով բնակեցված Վրաստանի Սամցխե-Ջավախքի շրջանում՝ քաղաք Ախալքալաքում, նախկին 62-րդ ռուսական ռազմաբազայի տեղում ռազմական վերապատրաստման կենտրոն կկառուցվի: Շինարարական աշխատանքները կավարտվեն 2019թ.: «Սա պատմական որոշում է, որն ընդունել է Վրաստանի կառավարությունը: Այստեղ խորհրդային բանակ է եղել, եւ այսօր այս վայրը նոր իմաստ է ստանում», - պաշտպանության նախարարի խոսքերը մեջբերում է «Վրաստանի նորությունները:
