![](img/news/22/46/80/default.jpg)
Բուլղարիայի էկոնոմիկայի եւ էներգետիկայի նախարարությունը կարծում է, որ նախագծային Stream Bulgaria ընկերությունը խախտել է «Հարավային հոսք» նախագծի իրականացման աշխատանքները դադարեցնելու մասին իշխանություններին տված խոստումը, ասված է նախարարության հաղորդագրությունում:
Փաստաթղթում նշվում է, որ էկոնոմիկայի եւ էներգետիկայի նախարար Վասիլ Շտոնովը օգոստոսի 11-ին որոշում էր ստորագրել՝ նախագծի շրջանակում ողջ գործունեության դադարեցման մասին՝ քանի դեռ այն չի համապատասխանեցվել ԵՄ օրենսդրությանը, սակայն օգոստոսի 12-ին ընկերությունը հայտարարել է կապիտալը մինչեւ 397,6 միլիոն լեւ (շուրջ 272 միլիոն դոլար) ավելացնելու վերաբերյալ որոշում ընդունելու մասին: Կապիտալի աճը գրանցվել է Բուլղարիայի արդարադատության նախարարության կողմից՝ օգոստոսի 18-ին:
«Էկոնոմիկայի եւ էներգետիկայի նախարարությունը կարծում է, որ South Stream Bulgaria-ի ղեկավարության գործողությունները չեն համապատասխանում Բուլղարիայի էներգետիկ հոլդինգի շահերին, եւ մտադիր է դիմել իրավապահ մարմիններին»,- ասվում է հաղորդագրությունում, փոխանցում է «ՌԻԱ Նովոստին»:
Ավելի վաղ հաղորդվել էր, որ Բուլղարիայի էկոնոմիկայի եւ էներգետիկայի նախարարությունը հրամայել է դադարեցնել «Հարավային հոսք» նախագծի բոլոր աշխատանքները, քանի դեռ այն չի համապատասխանում Եվրահանձնաժողովի պահանջներին: Օգոստոսի 18-ին Բուլղարիայի էներգետիկ հոլդինգին հասցեագրված համապատասխան նամակը ստորագրել է էկոնոմիկայի եւ էներգետիկայի նախարար Վասիլ Շտոնովը: