Արագածոտնի մարզի Ուջան գյուղի մոտ օգոստոսի 14-ին վթարի ենթարկված Հայաստանի պետական տնտեսագիտական համալսարանի ֆինանսական ֆակուլտետի դեկան Զաքար Կիրակոսյանի վիճակը դեռ ծանր է, նրան արհեստական շնչառություն է միացված: Այս մասին NEWS.am-ին ասաց «Սուրբ Գրիգոր Լուսավորիչ» բժշկական կենտրոնի փոխտօրեն Գագիկ Մանուկյանը:
Նրա խոսքով՝ Զաքար Կիրակոսյանը պարանոցի 7-րդ ողի կոտրվածք ունի, գիտակցության է եկել, սակայն դեռ չի խոսում:
NEWS.am-ին դեկանի հարազատները պատմեցին, որ դեպքի օրը նա վերադառնում էր մոր տնից, իսկ թե ինչպես է վթարը տեղի ունեցել, տեղյակ չեն:
«Մտածում ենք՝ կամ վատ է զգացել, ինքնատիրապետումը կորցրել է, կամ էլ առջեւից մեքենա է եկել, փորձել է խուսանավել ու էդպես շրջվել է: Դեպքի մասին անձամբ Զաքարը ոչինչ չի պատմել դեռ, բժիշկները թույլ չեն տալիս խոսել: Ականատեսները պատմում են, որ վթարից հետո մարդկանց հետ զրուցել է, օգնություն է խնդրել, հիվանդանոցում աշխատող հորեղբոր տղայի համարն է տվել, հետո ճանապարհին արդեն կտրուկ վատացել է»,- պատմեց բարեկամներից մեկը:
Նրա պնդմամբ՝ դեկանը երբեք արագությունը չի գերազանցել եւ ալկոհոլի ազդեցության տակ մեքենա չի վարել:
Նշենք, որ ժողինստիտուտի դեկանն ամուսնացած է, ունի 2 երեխա:
