«Օֆշորի գործով» կալանավորված գործարար Աշոտ Սուքիասյանին «խաբած» աֆրիկացիների նկատմամբ այդ երկրում կիրառված սանկցիաների եւ վերջինների ձերբակալման մասին փասատաթղթերն արդեն ներկայացվել են քննչական մարմնին: Այս մասին NEWS.am-ին ասաց հայ գործարարի փաստաբան Յուրիկ Խաչատրյանը:
«Աշոտ Սուքիասյանը դեռ հարցաքննվում է, հարցեր կան, որոնք ճշտման կարիք ունեն, ինճպես նաեւ այնպես պետք է անել, որ քննությունն օբյեկտիվ լինի, այնպես չի, որ այս ամեն ինչն ինքնանպատակ է: Բացի դրանից՝ Աֆրիկայից ուղարկված փաստաթղթերն ենք ներկայացրել քննիչներին: Այնպես որ դեռ չենք կարող ասել հստակ, թե հարցաքննության փուլը երբ կավարտվի»,- ասաց նա:
Փաստաբանի խոսքով՝ սնանկացման եզրին գտնվող գործարար Փայլակ Հայրապետյանի եւ Աշոտ Սուքիասյանի միջեւ առերեսումն էլ դեռ չի եղել:
Նշենք, որ Աշոտ Սուքիասյանը կալանավորվել է հունիսի 19-ին՝ Վրաստանից Հայաստան արտահանձնվելուց անմիջապես հետո: Նա գտնվում է «Երեւան-Կենտրոն» քրեակատարողական հիմնարկում, հարազատներին արգելված է տեսակցել գործարարին:
Հիշեցնենք, որ դեռ 2009թ. էկոնոմիկայի նախարարության շենքում նախարար Ներսես Երիցյանի մոտ ՀՀ այդ ժամանակ վարչապետ Տիգրան Սարգսյանի գլխավորությամբ հանդիպում-խորհրդակցություն էր կազմակերպվել 23 արդյունաբերական կազմակերպությունների ղեկավարների հետ, որի ժամանակ քննարկվել էր Ռուսաստանի՝ Հայաստանին տրամադրված 500 միլիոն դոլարի վարկը, որից 100 միլիոնը Ռուսաստանը պետք է տար ապրանքային տեսքով՝ ադամանդի հումքով։ Իսկ այդ 100 միլիոնի վարկը պետք է բաժանվեր այդ 23 կազմակերպությունների միջեւ, որպեսզի դրանք սկսեին աշխատել։ Գործարար Փայլակ Հայրապետյանն առաջարկել էր գրավադրել իր 33 մլն դոլար արժողությամբ իր ամբողջ անշարժ գույքը եւ «Ամերիաբանկը»-ից ստացված մոտ 10 միլիոն դոլարը տվել Աշոտ Սուքիասյանին, որն էլ վերցնելով գումարը՝ փախել էր երկրից: 2014թ. փետրվարին Աշոտ Սուքիասյանին հայտնաբերել էին Վրաստանում:
