Պերուի հարավում լեռներում ուղեւորատար ավտոբուսն ընկել է 200 մետր խորությամբ ձորը: Պատահարի արդյունքում առնվազն 20 մարդ է մահացել, եւս 11 հոգի տուժել է:
Պերուի ոստիկանության տեղեկություններով, ողբերգությունը տեղի է ունեցել Ապուրիմակ շրջանում: Ըստ ԻՏԱՌ ՏԱՍՍ-ի, Նասկա նահանգից Կուսկո ուղեւորվող ավտոբուսի ուղեւորները պետք է մասնակցեին կրոնական տոնի:
«Մեր շրջանում դժվար է փրկարարական աշխատանքներ իրականացնել: Մինչեւ հիմա ոչ մի մարմին վեր բարձրացնել մեզ չի հաջողվել»,- տեղեկացրել է ոստիկանության ներկայացուցիչը:
Բացի իրավապահներից, պատահարի վայրում աշխատում են փրկարարներն ու կամավորները: Ոստիկանությունը սկսել է հետաքննել դեպքի պատճառները:
