Քաղտեխնոլոգ Կարեն Քոչարյանը համոզված է, որ Հայաստանում ներքաղաքական կյանք չկա, նույնիսկ եռյակի հանրահավաք հրավիրելը ոչինչ չի փոխի երկրում: Այսօր` սեպտեմբերի 19-ին, լրագրողների հետ զրույցում ասաց քաղտեխնոլոգը նշեց, որ պարզ չի, թե հոկտեմբերի տասից հետո ինչ է անելու կամ ինչ է պահանջելու ընդդիմությունը:
«Հանրահավաք, հասկացանք, խոսում են, ինչ-որ բան են ասում, բայց ո՞րն է լինելու հետագա քայլը: Անում են, անելո՞ւ համար, թե՞ ունեն կոնկրետ նպատակ: Իշխանափոխությո՞ւնն է նպատակը: ԲՀԿ առաջնորդ Գագիկ Ծառուկյանից ես չեմ լսել իշխանափոխություն: Լեւոն Տեր-Պետրոսյանն ասում է իշխանափոխության մասին, բայց ինքը ոչինչ է առանց ԲՀԿ-ի: Նույն վիճակը իշխող կուսակցությունում էլ կա: Ո՞վ է տեսել, որ նախագահը կանչի խմբակցությանն ու ասի` գնացեք գործի: Ամոթ ա, զավեշտ ա սա»,- ասաց նա:
Կարեն Քոչարյանի կարծիքով` հասկանալու համար, թե ինչ է տեղի ունենալու Հայաստանում, պետք է հետեւել ուկրաինական դեպքերին:
Նշենք, որ խորհրդարանական ոչ իշխանական ուժերի եռյակը (ԲՀԿ, ՀԱԿ, «Ժառանգություն») հանրահավաք է հրավիրել հոկտեմբերի տասին Ազատության հրապարակում: ՀՅԴ-ն համատեղ հանրահավաքին չի մասնակցելու, քանի որ ի տարբերություն մյուս ուժերի, կողմ է սահմանադրական բարեփոխումներին, իսկ հանրահավաքում այդ մասին անպայման խոսք է լինելու:
