«Շրջանառության հարկի մասին» նոր օրենքի դեմ բողոքող մի քանի հարյուր առեւտրականներին, որոնք այսօր՝ սեպտեմբերի 29-ի առավոտից հավաքվել էին Ազգային ժողովի շենքի մոտ, քիչ առաջ հանդիպեցին ոչ իշխանական ուժերի՝ ԲՀԿ-ի եւ ՀԱԿ-ի ներկայացուցիչ պատգամավորները:
Պատգամավորները բողոքող առեւտրականներին վստահեցրին, որ արտահերթ նիստ հրավիրելու համար անհրաժեշտ 44 ստորագրությունը կհավաքվի մինչեւ վաղը, եւ հրավիրված ԱԺ արտահերթ նիստում կքննարկվի «Շրջանառության հարկի մասին» օրենքում փոփոխություններ մտցնելու մասին՝ ԲՀԿ-ական պատգամավոր Միքայել Մելքումյանի առաջարկած օրենսդրական նախագիծը:
«Այն օրենսդրական փոփոխությունները, որ մենք նախատեսել ենք, ներկայացնելու ենք արտահերթ նստաշրջանին: Խոսքն առաջինը 58.35 միլիոն դրամ շրջանառության մասին է, որը առաջարկելու ենք բարձրացնել մինչեւ 150 միլիոն դրամ: Եվ երկրորդ՝ նախատեսում ենք ներմուծել «Շրջանառության հարկի մասին» օրենքում կամավորության սկզբունք: Դա նշանակում է, որ այն տնտեսվարող սուբյեկտները, որոնք կցանկանան աշխատել 1% փաստաթղթավորումով, իրենք կընտրեն, չզրկենք իրենց այդ հնարավորությունից: Իսկ այն տնտեսվարողները, որոնք կցանկանան աշխատել 3.5%-ով, իրենք այդպես կաշխատեն»,-հավաքվածներին դիմեց Միքայել Մելքումյանը՝ նշելով, որ կարճ ժամկետում կհրավիրվի արտահերթ նիստ եւ հարցը կքննարկվի:
ՀԱԿ խմբակցության պատգամավոր Արամ Մանուկյանը առեւտրականներին հորդորեց վճռական լինել եւ պայքարից հետ չկանգնել: Նա նշեց, որ արտահերթ նիստ հրավիրելը միայն առաջին քայլն է, չի բացառվում, որ ՀՀԿ-ական պատգամավորները տապալեն այն:
Պատգամավորների խոսքը ոգեւորեց առեւտրականներին, նրանք համաձայնեցին պատգամավորների հետ:
Նշենք, որ տոնավաճառների աշխատակիցներն արդեն մի քանի բողոքի ցույցեր են անցկացրել կառավարության առջեւ՝ պահանջելով չեղյալ համարել օրենքը:
Հիշեցնենք, որ 2014թ. հոկտեմբերի 1-ից ուժի մեջ է մտնում «Շրջանառության հարկի մասին» ՀՀ օրենքը, ըստ որի տոնավաճառների աշխատողները իրենց ապրանքաշրջանառության վերաբերյալ փաստաթղթեր պետք է ներկայացնեն հարկային մարմնին։
Նոր փոփոխությամբ՝ առաջին անգամ փաստաթուղթ չներկայացնելու դեպքում ձեռնարկությունը նախազգուշացում է ստանում, երկրորդ անգամ՝ տուգանվում 20 հազար դրամի չափով, երրորդ անգամ՝ շրջանառության հարկի 5 տոկոսի չափով: Կառավարությունը նոր օրենքը հիմնավորում է խոշոր բիզնեսը հարկային դաշտ բերելու անհրաժեշտությամբ։