Եռյակի օրակարգում սկզբից զգուշավոր, կամաց-կամաց, իսկ այնուհետեւ հստակ պահանջ կդառնա իշխանափոխության հարցը: Այս մասին NEWS.am-ի թղթակցի հետ զրույցում ասաց քաղաքական վերլուծաբան Աղասի Ենոքյանը:
Նա չի բացառում, որ հոկտեմբերի 10-ին Ազատության հրապարակում կայանալիք հանրահավաքին իշխանափոխության հարցը կդրվի որպես հիմնական պահանջ, քանի որ այժմ կարծես թե ոչ կոալիցիոն ուժերը այլեւս չեն խոսում իրենց մյուս պահանջների մասին՝ կարմիր գծեր եւ այլն, շրջանառության մեջ է մնում իշխանափոխության հարցը:
Միաժամանակ, վերլուծաբանը չի բացառում, որ ԲՀԿ-ն մտնի բանակցությունների մեջ ՀՀԿ-ի, որպեսզի տեսնի, թե ինչ կունենա այս կամ այն զարգացումների արդյունքում: «Փաստորեն կատարվեց ԲՀԿ-ի պահանջը, իրենց ուզած վարչապետը նշանակվեց, հիմա կարծես ԲՀԿ-ն էլի իր համար խնդիրներ կլուծի այդ շագանակները կրակից հանելով ՀԱԿ-ի, «Ժառանգության» միջոցով: Այստեղ հիմնական դերակատարը, ռեժիսորը ԲՀԿ-ն է, իսկ մնացածները լավ կամ վատ դերասաններ են»,-ասաց Աղասի Ենոքյանը:
