Եգիպտոսի արտգործնախարարությունը հերթական անգամ խիստ կերպով է պատասխանել Թուրքիայի նախագահ Ռեջեփ Թայիփ Էրդողանի քննադատությանը՝ խորհուրդ տալով ուշադրություն դարձնել իր երկրում ազատությունների ոտնահարումներին, հաղորդում է «ՌԻԱ Նովոստին»՝ վկայակոչելով Եգիպտոսի ԱԳՆ-ին:
Աղբյուրի համաձայն, թուրք նախագահը Ստամբուլում անցկացվող Համաշխարհային տնտեսական ֆորումում ունեցած իր ելույթի ժամանակ կրկին զրպարտություններ է տարածել Եգիպտոսում տիրող իրավիճակի շուրջ: «Վերջին 12 տարիների ընթացքում Թուրքիայի ներքաղաքական կյանքին ուշադիր հետեւող ցանկացած մեկը կարող է եզրահանգել, որ պարոն Էրդողանը, որ իրեն համարում է դեմոկրատիայի հովանավոր ու արաբական գարնան հեղափոխության պաշտպան, իրականում շատ հեռու է դեմոկրատիայի ոգուց: Այսպիսով, նա այնպիսի իրավիճակում չէ, որպեսզի այլոց դեմոկրատիա եւ մարդու իրավունքների հարգանք սովորեցնի», - պարբերականը մեջբերում է Եգպիտոսի ԱԳՆ-ի հաղորդագրությունը:
«Նախքան ուրիշի գործերի մեջ քիթը մտցնելն ու իրեն դեմոկրատիայի հովանավոր հռչակելը, Եգիպտոսը պարոն Էրդողանին խորհուրդ է տալիս ուշադրություն դարձնել իր վրա եւ ուղղել իր ավտորիտար վարքագիծն ու բարեփոխել սարսափելի վիճակում գտնվող մարդու իրավունքների ոլորտը», - ասվում է ԱԳՆ-ի հայտարարության մեջ:
Թուրք-եգիպտական հարաբերությունները կտրականապես վատթարացել են Եգիպտսի նախագահ Մուհամեդ Մուրսիի տապալումից հետո: