ՀՀ կենտրոնական բանկում այսօր՝ հոկտեմբերի 1-ին, տեղի է ունեցել «Իմ ֆինանսների միամսյակ» ծրագրի բացումը: Այս մասին NEWS.am-ին հայտնեցին ԿԲ հասարակայնության հետ կապերի ծառայությունից:
ՀՀ ԿԲ նախաձեռնությամբ հոկտեմբերը հայտարարվել է անձնական ֆինանսներին նվիրված ամիս: Ողջունելով մասնակիցներին, ԿԲ խորհրդի անդամ Արմենակ Դարբինյանը նշել է, որ արդեն 2-րդ անգամ իրականացվող ծրագրի նպատակը ֆինանսական կրթման մակարդակի բարձրացումն է, ինչպես նաեւ անձնական ֆինանսների կառավարման կարեւորումը:
ՀՀ-ում ԳԴՀ փոխդեսպան Նադիա Լիխտեմբերգերը նշել է, որ «Իմ ֆինանսների միամսյակ» ծրագիրը բացառիկ հնարավորություն է տարբեր ֆինանսական կազմակերպությունների համար իրենց ծառայությունները բնակչությանը ներկայացնելու առումով:
Հոկտեմբերի 1-31-ը մայրաքաղաքում եւ մարզերում կիրականացվեն մի շարք միջոցառումներ՝ սեմինարներ ու ֆինանսական բանավեճեր կրթական հաստատություններում, բազմատեսակ մրցույթներ, բացօթյա էքսպո-ցուցահանդեսներ, «Ի՞նչ, Որտե՞ղ, Ե՞րբ» ինտելեկտուալ խաղ, «Ֆինանսական շրջագայություն» ավտոբուսով, «Երազանքների ծառ», եւ այլն: Ծրագրին ակտիվորեն մասնակցում են ՀՀ առեւտրային բանկերը, վարկային կազմակերպություններն ու ապահովագրական ընկերությունները: «Իմ ֆինանսների միամսյակ» ծրագիրը կեզրափակվի նոյեմբերի 4-ին:
