Մինվոդիի հիվանդանոցի զանգվածային կռվի գործով եւս երկու կասկածյալ է ձերբակալվել, հայտնում է ԻՏԱՌ-ՏԱՍՍ-ը՝ վկայակոչելով ՌԴ ՔԿ-ի պաշտոնական ներկայացուցիչ Վլադիմիր Մարկինին:
Ըստ նրա՝ ձերբակալվել են 20-ամյա Մաքսիմ Ցականյանը եւ 17-ամյա դեռահաս, որոնք մասնակցել են Ռուսլան Աբդուլժալիլովի եւ բուժքույր Նինա Ստանկայի ծեծելու գործողությանը:
Դատարան միջնորդագիր է ուղարկվել նրանց նկատմամբ կալանքը որպես խափանման միջոց կիրառելու մասին: Ավելի վաղ ձերբակալվել էին Անդրանիկ Ցականյանը, Եվգենի Սմիրնովը եւ Սամվել Մանուչարյանը: Հայտնի է դարձել Անատոլի Լարիոնովին ծեծողներից եւս 4-ի ինքնությունը: Նրանք բոլորը հետախուզվում են, նշել է Մարկինը:
NEWS.am-ն ավելի վաղ հայտնել էր, որ սեպտեմբերի 20-ին Մինվոդիի հիվանդանոցի ընդունարանում զանգվածային կռիվ էր տեղի ունեցել. 36 մարդ ներխուժել էին բուժհաստատություն եւ ծեծել ներսում գտնվող տղամարդուն՝ 31-ամյա Անատոլի Լարիոնովին, որն ավելի ուշ վախճանվել էր Պյատիգորսկի հիվանդանոցում, նաեւ մարմնական վնասվածքներ էին հասցրել Ռուսլան Աբդուլժալիլովին եւ բուժքույր Նինա Ստանկային: Դեպքից անմիջապես հետո հարուցվել էին քրգործեր՝ «Խուլիգանություն» եւ «Առողջությանը միտումնավոր ծանր վնաս հասցնելը» հոդվածներով: Ավելի ուշ հոդվածներից մեկը վերաորակավորվել էր՝ «Առողջությանը միտումնավոր ծանր վնաս հասցնելը, որը հանգեցրել է տուժածի մահվան»:
Լայն արձագանք ստացած հանցագործության պատճառով Մինվոդիի իշխանությունները չեղյալ են հայտարարել հոկտեմբերի 4-ին քաղաքի օրվան նվիրված միջոցառումները:
