Հայաստանի վարչապետ Հովիկ Աբրահամյանին «մտահոգում է», որ ԱԺ ոչ իշխանական քառյակը հանրահավաքներ է անցկացնում մարզերում, լարում իրավիճակը, մինչդեռ ինքը ցանկանում է, որ ժողովրդի առջեւ ծառացած խնդիրները քաղաքական ուժերը միասին լուծեն:
Այսօր` հոկտեմբերի երկուսին, լրագրողների հարցին, թե ինչու Ազգային ժողովում վարչապետը հայտարարեց, թե «մարտի մեկ ե՞ք ուզում», այսպես պատախանեց Հովիկ Աբրահամյանը. «Այն ձեւաչափը, որ ընտրել են` գնալ մարզեր, հանրահավաքներ անցկացնել, ինձ մտահոգում է: Ինձ համար կարեւոր է, որ գնան, ցիվիլ ձեւով անեն միտինգ: Իմ մտահոգությունն այն է, որ չգնան, այդ տոնով չխոսեն, չեմ ուզում` նորից Մարտի մեկ լինի: Իսկ մենք առաջարկում ենք` եկեք միասին քննարկենք, ժողովրդի առջեւ ծառացած խնդիրները լուծենք: Ես իմ մտահոգությունն եմ հայտնել»:
Հարցին, թե ինչ կփոխվի եռյակի համապետական հանրահավաքից հետո, վարչապետը պատասխանեց. «Էսօր ամսի քանի՞սն է, երկուսը չէ՞: Մինչեւ տասը ժամանակ կա, սպասենք»:
Նշենք, որ հոկտեմբերի տասի համապետական հանրահավաքին ընդառաջ ԲՀԿ-ն, ՀԱԿ-ն ու «Ժառանգությունը» իրազեկման հավաքներ են անցկացնում մարզերում:
