«Շրջանառության հարկի մասին» ՀՀ օրենքն իշխանությունները երկու ամիս տարբեր հարթակներում քննարկել ենք, սակայն ոչ մի քաղաքական ուժ մտահոգություն չի հայտնել այդ ընթացքում: Այս մասին այսօր` հոկտեմբերի երկուսին, լրագրողների հետ զրույցում ասաց Հայաստանի վարչապետ Հովիկ Աբրահամյանը:

«Անհասկանալի եւ անընդունելի է, որ մենք առաջարկում ենք համագործակցել, ժողովրդի խնդիրներին լուծում տանք, իսկ իրենք լարում են իրավիճակը: Մենք առաջարկում ենք, որ բարեփոխումների փաթեթ քննարկենք: Հենց օրինակ շրջանառության օրենքի մասին մենք քննարկումներ ենք արել, սակայն ոչ մի քաղաքական ուժի կողմից բացասական կարծիք չեմ լսել: Սխալ է միանալ, կոչեր անել, լարել իրավիճակը, դա ո՞ւմ շահից է բխում»,- ասաց վարչապետը:

Հովիկ Աբրահամյանը չի հասկանում, թե ինչու պետք է նոր օրենքը կասեցնել: Նրա կարծիքով` ժողովուրդը պարզապես չի պատկերացնում այս օրենքի առավելությունները:

«Եթե տեխնիկական խնդիրներ կան, թող ասեն, լուծենք մասին, իսկ իրենք ասում են` կասեցրեք: Ինչ վերաբերվում է փաստաթղթավորմանը, ապա եթե հարկային մարմինը տեսնում է, որ առանց փաստաթղթի է աշխատում, ապա մեկ անգամ պետք է զգուշացնի, երկրորդ անգամ տուգանի»:

Հիշեցնենք, որ 2014թ. հոկտեմբերի 1-ից ուժի մեջ է մտնում «Շրջանառության հարկի մասին» ՀՀ օրենքը, ըստ որի տոնավաճառների աշխատողները իրենց ապրանքաշրջանառության վերաբերյալ փաստաթղթեր պետք է ներկայացնեն հարկային մարմնին։ Նոր փոփոխությամբ՝ առաջին անգամ փաստաթուղթ չներկայացնելու դեպքում ձեռնարկությունը նախազգուշացում է ստանում, երկրորդ անգամ՝ տուգանվում 20 հազար դրամի չափով, երրորդ անգամ՝ շրջանառության հարկի 5 տոկոսի չափով: Կառավարությունը նոր օրենքը հիմնավորում է խոշոր բիզնեսը հարկային դաշտ բերելու անհրաժեշտությամբ։