Ռուբլու փոխարժեքի անկումը պետք է դիտարկել երկու տեսանկյունից. Առաջինը Ռուսաստանի նկատմամբ սանկցիաներն են, իսկ երկրորդը՝ եվրո- դոլար հարաբերակցությունը, որտեղ դոլարը ամրապնդում է իր դիրքերը: Այս մասին NEWS.am-ի թղթակցի հետ զրույցում ասաց ԲՀԿ խմբակցության պատգամավոր, տնտեսագետ Միքայել Մելքումյանը:
Նա շեշտեց, որ դա կապված է ԱՄՆ-ի տնտեսության արձանագրած որոշակի աճի հետ, ինչի արդյունքում գործազրկությունը նվազել է, անշարժ գույքի գները՝ բարձրացել եւ այս առումով լուրջ աշխուժացում է նկատվում ԱՄՆ-ում:
Պատգամավորը նշեց նաեւ, որ մեծ նշանակություն ունի նաեւ ռուսական տնտեսության աճի դանդաղումը, ինչի հետեւանքով բավականին ծրագրեր խափանվել են: Դրա վրա, նրա կարծիքով, ազդեցություն են ունեցել նաեւ Ռուսաստան-Ուկրաինա հարաբերությունները:
Միքայել Մելքումյանը շեշտեց, որ ռուբլու փոխարժեքի անկումը Ռուսաստանի համար ունի երկակի ազդեցություն, հնարավոր է՝ այն բերում է արտահանման աճի խթանման:
ԲՀԿ-ական պատգամավորը շեշտեց, որ ռուբլու արժեզրկումը ազդում է նաեւ Հայաստանի տնտեսության վրա: Բացասական ազդեցությունն է այն, որ կկրճատվի Ռուսաստանից եկող տրանսֆերների ծավալը:
Ինչ վերաբերում է պնդմանը, թե ՌԴ-ի նկատմամբ պատժամիջոցները լավ առիթ են հայկական ընկերությունների համար ռուսական շուկան գրավելու համար, պատգամավորն ասաց, որ ռուսական շուկան կայուն է եւ շատ մեծ, եւ արտահանման մասով կարող են օգտվել հատկապես գյուղատնտեսության վերամշակմամբ զբաղվող ընկերությունները, շինարարական ընկերությունները եւ ստեղծված վիճակը կարող է նպաստել կապիտալի ազատ տեղաշարժին: Բայց, մյուս կողմից էլ, պատգամավորի կարծիքով, գյուղանտեսության ուղղությամբ հայկական ընկերությունները չեն կարող այդ ծավալի արտադրանք արտահանել, անհրաժեշտ է ծավալների ընդլայնում, իսկ դրա համար՝ լրացուցիչ ռեսուրսներ, բայց խնդիրն հենց ռեսուրսների հայթայթման մեջ է, քանի որ մեր բանկերը բարձր տոկոսադրույքներով են վարկ տալիս:
