Խորհրդարանական եռյակը («Ժառանգություն», ԲՀԿ, ՀԱԿ) չի մեկնաբանի ՀՅԴ խմբակցության ղեկավար Արմեն Ռուստամյանի հայտարարությունն այն մասին, որ եռյակը իշխանության հետ բանակցություններ է վարում:
«Բարգավաճ Հայաստան» խմբակցության քարտուղար Նաիրա Զոհրաբյանը հայտարարեց, որ մտադիր չէ մեկնաբանել այդ հայտարարությունը: «Նմանատիպ հայտարարություններ մեկնաբանելու ցանկություն չունեմ»: Ինչ վերաբերում է այն հանգամանքին, որ ՀՅԴ-ին չեն հրավիրել երկրի ճգնաժամային իրավիճակի կապակցությամբ խորհրդարանի արտահերթ նիստ անցկացնելու նախաձեռնության քննարկմանը, Զոհրաբյանը հայտարարեց. «Ես զարմացած եմ, քանի որ Ռուբեն Հակոբյանն ու Լեւոն Զուրաբյանը պետք է ներկայացնեին ՀՅԴ-ի նախաձեռնությունը»:
Հայ ազգային կոնգրես խմբակցության քարտուղար Լեւոն Զուրաբյանը հրաժարվեց որեւէ կերպ մեկնաբանել հարցը:
«Ժառանգություն» խմբակցության քարտուղար Թեւան Պողոսյանի խոսքով՝ նա առաջին անգամ է լսում, որ խորհրդարանական եռյակը բանակցություններ է վարում իշխանության հետ. «Ես անձնապես ոչ մի բանակցության չեմ մասնակցում, չեմ լսել ու տեսել, սակայն եթե կան նմանատիպ բանակցություններին քաջատեղյակ մարդիկ, թող մանրամասն ներկայացնեն: Յուրաքանչյուրը կարող է կարծիքը հայտնել»:
Հիշեցնենք, որ լրագրողների հետ զրույցի ժամանակ Դաշնակություն խմբակցության ղեկավար Արմեն Ռուստամյանը՝ ի պատասխան հարցին՝ հնարավո՞ր է, արդյոք, խորհրդարանական եռյակը կարծում է, որ ՀՅԴ-ն ու իշխանությունները գործարք են կնքել եւ հենց այդ պատճառով նրանց հետ միասին նախաձեռնությունը չեն քննարկել, Ռուստամյանը ասաց. «Լսեք, նրանք նույնպես բանակցություններ են վարում իշխանության հետ: Նրանք բանակցություններ են վարում իրենց հարցերի շուրջ, իսկ հետո պարզ կլինի»:
