Հայաստանի սահմանամերձ գյուղերի համար անհրաժեշտ է սոցապահովման հատուկ ընթացակարգ: Այդ մասին այսօր՝ նոյեմբերի 17-ին, խորհրդարանում հայտարարեց ՀՅԴ խմբակցության պատգամավոր, ֆինանսական հարցերով հանձնաժողովի փոխնախագահ Արծվիկ Մինասյանը՝ մեկնաբանելով «Սահմանամերձ համայնքների սոցիալական աջակցության մասին» կառավարության օրինագիծը:
Նրա խոսքով՝ բավական չէ առաջարկել միայն գնդակոծության վտանգի տակ գտնվող հողերի հարկի փոխհատուցում, ինչպես նշվում է օրինագիծում: Պետք է հաշվարկել նաեւ այն շահույթը, որից զրկվում է գյուղացին, քանի որ այդ սպառնալիքի պատճառով չի կարող մշակել հողը: Սա պետք է հաշվի առնել գյուղացիների սոցիալական վիճակի գնահատման եւ նպաստների հնարավոր նշանակման ժամանակ: Իսկ հողը, որը իրավաբանորեն պատկանում է գյուղացուն, չպետք է հաշվի առնվի սոցիալական ապահովվածության ցուցանիշի հաշվարկման ժամանակ: «Մենք պետք է հասկանանք՝ ինչի կարիք ունեն այդ մարդիկ, որպեսզի տեսնենք, թե ինչ ծավալի օգնություն է նրանց անհրաժեշտ», - կարծում է Մինասյանը:
Նշենք, որ օրինագծի համաձայն, հակառակորդի հետ հակամարտությունից տուժող բնակավայրերի բնակիչները գազի, էլեկտրաէներգիայի եւ ոռոգման ջրի վճարների 50% եւ հողի հարկի ու հակառակորդի կրակի տակ գտնվող օբյեկտների գույքահարկի ամբողջական փոխհատուցում կստանան:
