Ռուսաստանի նախագահ Վլադիմիր Պուտինը բացահայտ սպառնացել է Ուկրաինայի նախագահ Պյոտր Պորոշենկոյին նոր հարձակմամբ, եթե Ուկրաինան չհրաժարվի Եվրամիությանը եւ ՆԱՏՕ-ին անդամակցելու մտքից, եւ եթե չճանաչի «ԴԺՀ»-ն եւ «ԼԺՀ»-ն, հայտնում են ուկրաինական լրատվամիջոցները:
Նոյեմբերի 26-ին Պորոշենկոն երկար, 1,5 ժամանոց զրույց է ունեցել Պուտինի հետ, որից հետո նախագահը բավականին ճնշված է ներկայացել խմբակցության նիստին, հայտնում է Insider-ը:
«Ռուսաստանի հետ խնդիր ունենք. նրանք մեզ սպառնում են հարձակում գործել եւ պահանջում են ճանաչել անջատողական հանրապետությունները, ինչպես նաեւ հրաժարվել ՆԱՏՕ-ին եւ ԵՄ-ի անդամակցությունից», - հայտնել է նախագահի վարչակազմի անդամներից մեկը:
Insider-ը նաեւ հաղորդում է, որ անցած հինգշաբթի կոալիցիոն համաձայնագրի նախապատրաստման աշխատանքային խմբում Պորոշենկոյի դաշինքը չի ցանկացել ստորագրել ՆԱՏՕ-ին Ուկրաինայի անդաակցությունը նախատեսող փաստաթուղթը, սակայն մյուս խմբակցությունների ներկայացուցիչները պնդել են: Մեկ օր անց՝ Մայդանի հասարակական ակտիվիստների հետ հանդիպման ժամանակ, Պորոշենկոն հայտարարել է, որ դժգոհ է այդ որոշումից:
«Դուք կարծում եք՝ լավ բան եք արել, սակայն իրականում դա շատ վատ է: Շուտով դաշինքը կհայտարարի, որ չի կարող մեզ ընդունել», - ակտիվիստներին հայտարարել է Պորոշենկոն: «Քանի դեռ մենք պատերազմում ենք Արեւելքում, ոչ ոք մեզ ՆԱՏՕ չի ընդունի: Իսկ դա Պուտինին ավելի կզայրացնի», - հայտարարել են Ուկրաինայի նախագահի համախոհները: