Նիկոլ Փաշինյանի՝  Սերժ Սարգսյանի պաշտոնանկության հարցը բարձրացնելու առաջարկը դեռ չենք ստացել, բայց գաղափարը ընդունելի է: Այս մասին այսօր՝ նոյեմբերի 27-ին, լրագրողների հետ հանդիպման ժամանակ նշեց ՀՀՇ անդամ, ԱԺ պատգամավոր Ալեքսանդր Արզումանյանը:

Նա նշեց, որ գաղափարը իր համար՝ որպես ընդդիմադիր գործիչ, հասկանալի եւ ընդունել է. նա պատրաստ է պաշտպանել այն եւ վստահ է, որ կուսակցությունն էլ դրական գնահատական կտա:

Ալեքսանդր Արզումանյանը նկատեց, որ Նիկոլ Փաշինյանը իր այս նախաձեռնության այլ խնդիր է հետապնդում, նա ցանկանում է հստակեցնել, թե ի վերջո՝ ով է ընդդիմությունը: «Ինքը ասում է, որ, ժողովուրդ, դուք խոսում եք իշխանափոխության մասին, ասում եք՝ արտահերթ ընտրություններ, ճանապարհ ցույց չեք տալիս, ահա, առաջարկում եմ ճանապարհ, ստորագրություններից պարզ կլինի»,-ասաց նա:

Պատգամավորը նաեւ նշեց, որ ՀԱԿ-ը եւ ԲՀԿ-ն միասին կարող են 44 ստորագրություն հավաքել, եւ Նիկոլ Փաշինյանը նրանց ծառայություն է մատուցում՝ ասելով, որ ձեզ տալիս եմ հնարավորություն: «Գուցե սա լյուստրացիայի գործընթաց է ընդդիմության դաշտում, աշունը ավարտին է մոտենում, Փաշինյանը ձգտում է թեժացնել, խոստացված թեժացումը մտցնել դաշտ եւ այստեղ կարեւոր է չիշխանություն կոչված կոմբլոմեռատի դիրքորոշումը»,-ասաց նա:

Հիշեցնենք, որ ՀԱԿ խմբակցության պատգամավոր Նիկոլ Փաշինյանը պատրաստվում է Սերժ Սարգսյանի պաշտոնանկության մասին նախագիծ ներկայացնել: Այդ նպատակով նա դիմելու է ոչ իշխանական ուժերին անհրաժեշտ 44 ստորագրությունները հավաքելու եւ այս հարցը արտահերթ կարգով խորհրդարանի լիագումար նիստում քննարկելու համար։