Գազի գնի բարձրացման դեմ բողոքող՝ մի քանի տասնյակ երթուղայինների վարորդներ այսօր՝ դեկտեմբերի 18-ին, վաղ առավոտից փակել են Նոր Նորքի Գայի պողոտան՝ երթուղային տաքսիները կանգնեցնելով փողոցում:
NEWS.am-ի թղթակիցը հաղորդում է, որ վարորդները երթուղայինները փողոցից հանեցին միայն ոստիկանության եւ դեպքի վայր ժամանած՝ քաղաքապետարանի աշխատակիցների հորդորից հետո:
Թեեւ վարորդները մեքենաները դուրս են բերել փողոցից, սակայն բողոքը շարունակում են՝ պնդելով, որ աշխատանքի դուրս կգան միայն այն դեպքում, եթե գազի սակագնի իջեցման որոշում լինի:
«Փակել էինք ճանապարհը, որովհետեւ անօրինական թանկացումներ են, մենք եկել ենք կանգնել ենք էստեղ, որ կարողանանք մեր երեխեքի համար գումար աշխատենք: Վստահ ենք՝ ավելի շատ վարորդներ կմիանան մեզ»,- NEWS.am-ին ասաց վարորդներից մեկը:
«Մենք եկել, գծատերերի հետ փորձում ենք պայմանավորվել, որ հարցին լուծում տանք: Մենք գազի եւ վառելիքի հարց լուծող չենք, մեր վերեւներին տեղյակ ենք պահել: Մենք փորձում ենք աշխատացնենք տրանսպորտը: Հիմա ժողովուրդը ոչ միայն տրանսպորտից է դժգոհ, այլեւ բոլոր թանկացումներից»,- լրագրողներին ասաց Երեւանի տրանսպորտի վարչության պետ Հենրիկ Նավասարդյանը:
Այս պահին վարորդների թիվը հետզհետե ավելանում է, ակցիայի վայր են ժամանել նաեւ ոստիկաններ:
NEWS.am-ի թղթակցի հաղորդմամբ՝ վարորդներն այս պահին շարժվում են դեպի կառավարության շենք:
Նշենք, որ Երեւանի տարբեր վարչական շրջաններում տարբեր երթուղային գծեր վաղ առավոտից չեն աշխատում, գրեթե բոլոր կանգառներում մարդկանց մեծ հերթեր են գոյացել, քաղաքացիները ավելի քան 50 րոպե սպասում են երթուղայինններին:
