Հայաստանի վարչապետ Տիգրան Սարգսյանն այսօր՝ հուլիսի 9-ին աշխատանքային այցելությամբ եղել է Կոտայքի մարզում։

Կառավարության մամուլի ծառայությունից NEWS.am-ին հայտնում են, որ վարչապետի առաջին կանգառը եղել է Մարմարիկում, որտեղ կառավարության ղեկավարը ծանոթացել է ջրամբարի շինարարական աշխատանքների ընթացքին, եւ ոլորտի պատասխանատուների հետ քննարկել շինարարական աշխատանքների մանրամասներն ու ժամկետները։ Ջրամբարի կառուցումը հնարավորություն կստեղծի էլեկտրաէներգիայի տնտեսման, ինչպես նաեւ մարզի ոռոգման խնդիրների լուծման համար։ Շուրջ 4,6 մլրդ դրամի արժեքով շինարարությունն իրականացվում է ՀԲ «Ջրամբարների անվտանգություն» ծրագրի շրջանակներում եւ կավարտվի մինչեւ տարեվերջ։

Այնուհետեւ կառավարության ղեկավարը մեկնել է Աղվերան, որտեղ մասնակցել է «Աղվերան հոթել» հյուրանոցային համալիրի բացման արարողությանը։ Միջոցառմանը հաջորդել է Միջազգային ֆինանսական կորպորացիայի եւ հայաստանյան «Էլիտ գրուպ» ընկերության միջեւ համաձայնագրի ստորագրման արարողությունը, որով ընկերությունը ստանում է 9 մլն. դոլար։

Ամփոփելով այցը` կառավարության ղեկավարը նշել է, որ կարեւորում է մարզերի սոցիալ- տնտեսական շարունակական եւ համակողմանի զարգացումը։