Ադրբեջանում լրջորեն քննարկում են բանտարկյալ Լամիա Գուլիեւայի երեխայի հոր անձի հարցը: Ադրբեջանական լրատվամիջոցների փոխանցմամբ, Լ.Գուլիեւայի պատմությունն ամենասկանդալայիններից է Ադրբեջանի քրեական խրոնիկայում: Նա դատապարտվել է իր փեսացուի հետ Շամխորի շրջանի գործադիր իշխանության նախկին ղեկավարի՝ հայտնի մաֆիոզ Ասլան Ասլանովի որդու սպանությանը մասնակցության համար: Դատարանում մարդասպանները խոստովանել են մեղքը՝ հայտարարելով, որ այդպիսով պաշտպանել են իրենց պատիվն ու արժանապատվությունը:
Տարիներ անց Գուլիեւան բանտում երեխա է ունեցել, ինչը սկսել է նրա երեխայի հոր մասին խոսակցությունների առիթ տալ: Ըստ «Ազադլիգ» պարբերականի, Լամիա Գուլիեւան իր փաստաբանի միջոցով նամակ է ուղարկել՝ նշելով, որ իրեն դուր չի գալիս իր անձի շուրջ նման իրարանցումից:
«Ինձ անհանգստացնում է այն, որ բոլորին մտահոգում է իմ երեխայի հոր հարցը, մինչդեռ ոչ ոք չէր հետաքրքրվում այն խնդիրներով, որոնց ես բախվել եմ: Պետք չէ մեղադրել ուղղիչ տան աշխատակիցներին, նրանք ոչ մի առնչություն չունեն իմ երեխայի հետ: Ինձ ոչ ոք չի բռնաբարել, ես իմ սեփական ցանկությամբ եմ հղիացել: Ես բանտում եմ 15 տարեկանից եւ ազատ արձակման օրերն ու ժամերն էի հաշվում: Սակայն ինձ առաջադրված կեղծ մեղադրանքները սպանեցին ազատագրման հույսը»,- ասել է Լամիա Գուլիեւան:
Նրա խոսքով, իր բանտարկության ժամկետը եւս 6 տարով երկարացնելուց հետո ինքը խորը դեպրեսիայի մեջ է ընկել եւ փրկվելու համար որոշել է երեխա ունենալ:
«Ես տղամարդու հետ կապի մեջ մտա անհույս վիճակի պատճառով: Կարծում էի՝ բանտում կանցկացնեմ մնացած ամբողջ կյանքս: Մինչ քննարկում էին իմ վերաքննիչ բողոքը, ես Բաքվի բանտում էի: Այնտեղ էլ սեռական կապի մեջ մտա կալանավորներից մեկի հետ, ով իր դատավճռին էր սպասում: Հենց նա էլ իմ երեխայի հայրն է: Այս մասին ես արդեն պատմել եմ քննիչներին եւ ներկայացրել եմ ԴՆԹ-ի նմուշները»,- ասել է նա:
