Մահվանից մեկ տարի անց հայտնաբերված՝ Վանաձորի բնակիչ, 38-ամյա Սումբատ Ասլիկյանի մահվան դեպքով քրեական գործ չի հարուցվել:
NEWS.am-ին ՀՀ Քննչական կոմիտեի մամուլի ծառայությունից հայտնեցին, որ կայացվել է քրեական գործի հարուցումը մերժելու մասին որոշում՝ հանցագործության դեպքի բացակայության հիմքով:
Ավելի վաղ ՀՀ Քննչական կոմիտեն հայտնել էր, որ 2015 թվականի հունվարի 3-ին Վանաձորի Նարեկացու 28 հասցեում գտնվող նախկին շինարարական իրերի կոմբինատի տարածքի չօգտագործվող ավտոտնակում հայտնաբերվել է պարանոցից մալուխի մեկուսիչով կախվելու միջոցով ինքնասպանություն գործած, Վանաձոր քաղաքի բնակիչ, 38-ամյա Սումբատ Ասլիկյանի դիակը: Դեպքի կապակցությամբ ՀՀ քննչական կոմիտեի Լոռու մարզային քննչական վարչությունում նախապատրաստվել են նյութեր, որի ընթացքում կատարվել է դիակի դատաբժշկական փորձաքննություն եւ 2015 թվականի հունվարի 13-ին ստացված դատաբժշկական փորձաքննության թիվ 16 եզրակացության համաձայն՝ հանգուցյալի մահը վրա է հասել շուրջ մեկ տարի առաջ:
Դիակի խորը նեխային փոփոխությունների հետեւանքով, դիակի կմախքացման եւ դիակի փափուկ հյուսվածքների ու ներքին օրգանների բացակայության պատճառով հնարավոր չէ որոշել հանգուցյալի մահվան պատճառը:
