«Նուբարաշեն» քրեակատարողական հիմնարկի դիմաց այս պահին մեծ թվով ոստիկաններ կան, քննչական գործողություններ են կատարվում։ Նուբարաշեն ՔԿՀ տանող փողոցը փակ է։ NEWS.am-ի թղթակիցը դեպքի վայրից  հաղորդում է, որ քիչ առաջ հնչած կրակոցների հետեւանքով զոհվածներից մեկի մարմինը դեռ ընկած է ավտոկայանատեղիում, որտեղ էլ տեղի է ունեցել դեպքը։ Նա հրազենային մահացու վնասվածք է ստացել գլխի շրջանում։

Ոստիկանության լրատվական ծառայությունից մեզ հայտնեցին, որ ահազանգը ստացվել է ժամը 13։59-ին։ Դեպքի վայր ժամանած ոստիկանները հայտնաբերել են 1 զոհի եւ 2 վիրավորի, վիրավորներին տեղափոխել են «Էրեբունի» ԲԿ։ Հիվանդանոցից մեզ հայտնեցին, որ 2 երիտասարդներին իրենց մոտ տեղափոխել են արդեն հրազենային վնասվածքներից մահացած վիճակում։

Այս պահին դեպքի վայրում է Երեւանի ոստիկանապետ Աշոտ Կարապետյանը։ Զոհերի ինքնության մասին պաշտոնական տեղեկություններ դեռ չեն տրամադրում։

 NEWS.am-ի աղբյուրների փոխանցմամբ՝ «Նուբարաշեն» քրեակատարողական հիմնարկի մոտ կրակոցների հետեւանքով սպանվածներից մեկը քրեական հեղինակություն «Երրորդմասցի Լյովիկն» է:

Ավելի վաղ NEWS.am-ը հայտնել էր, որ քիչ առաջ Նուբարաշեն համայնքում հնչել են կրակոցներ:

Նախնական տեղեկություններով մի քանի հոգի ինքնաձիգերով կրակ են բացել «Նուբարաշեն» ՔԿՀ-ի մոտ, որի հետեւանքով կա երեք զոհ:

Լուսանկարները՝ Արսեն Սարգսյանի/NEWS.am