Նրանց հետ, ովքեր որոշել են ապրիլի 24-ը քաղաքական շոուի վերածել, ՀՅԴ-ն ընդհանուր ոչինչ չունի եւ չի էլ կարող ունենալ։ Այս մասին մարտի 27-ին կայացած խորհրդարանական ճեպազրույցների ժամանակ հայտարարել է ԱԺ ՀՅԴ խմբակցության ղեկավար Արմեն Ռուստամյանը։ Պատգամավորը նշել է, որ իր ուղեղում չի տեղավորվում, թե ինչպես կարելի է այդ օրվա հետ որեւէ քաղաքական պայքար կապել։
«Մենք պետք է աշխարհին ցույց տանք, որ նույնիսկ 100 տարի անց հայերը խնդիր ունեն, որից չեն հրաժարվում։ Եվ եթե մեր հայրենակիցներից ինչ-որ մեկը դեռ չի հասկացել, որ դա սրբության սրբոց է, առանցք, որը միավորում է մեզ բոլորիս, որ դա շահարկել չի կարելի, ապա նմանների հետ մենք ոչ հանրահավաքի կգնանք, ոչ էլ սեղանի շուրջ կնստենք»,- հայտարարել է Ռուստամյանը։
Նրա խոսքով՝ պետք չէ մոռանալ, որ ակցիաները կազմակերպվելու են միջազգային հանրության աչքի առաջ։ Հայաստանը ռիսկի է դիմում աշխարհի առաջ խայտառակել իրեն, եթե այդ օրը քաղաքական ցույց տեղի ունենա։ «Դա մեր բոլոր թշնամիներին մատուցած ամենալավ նվերը կլինի։ Ուստի կոչ եմ անում մեր հայրենակիցներին հեռու մնալ այդ գաղափարից։ Ես հարգում եմ յուրաքանչյուրի կարծիքը եւ պայքարի իրավունքը։ Բայց ամեն բան իր տեղն ու ժամանակն ունի»,- հայտարարել է Ռուստամյանը։
Հիշեցնենք, որ «Հիմնադիր խորհրդարան»-ը հայտարարում է Հայաստանում մինչեւ ապրիլի 24-ը իշխանափոխության հասնելու անհրաժեշտության մասին։ Օրվա ընտրությունը հայ հասարակության մեջ միանշանակ չի ընկալվում։