Սահմանադրական բարեփոխումները միայն Դաշնակցությանը չեն պետք: Այս մասին, այսօր՝ մարտի 27-ին, ԱԺ-ում ճեպազրույցների ժամանակ նշել է ՀՅԴ խմբակցության ղեկավար Արմեն Ռուստամյանը:
Հարցին՝ պատրա՞ստ է ՀՅԴ-ն համագործակցել իշխանությունների հետ, եթե սահմանադրական փոփոխությունների վերաբերյալ իրենց առաջարկներն ընդունվեն, Ռուստամյանը պատասխանել է. «Արդեն որերորդ անգամ Դաշնակցությանը հարցնում են, դուրս չի՞ գա ՀՅԴ-ն կոալիցիայից, եթե նա այնտեղ է, եւ չի՞ մտնի կոալիցիա, եթե նա այնտեղ չէ: Շատերի համար ավելի կարեւոր է հարցը հնչեցնելը, քան դրա պատասխանը լսելը: Դրա համար այդպիսի հարցեր նորից ու նորից տալիս են»:
Նրա խոսքով՝ ՀՅԴ-ն կմտնի ցանկացած կոալիցիա, եթե դա իր քաղաքական ծրագրերի իրականացման ճանապարհ կբացի: «Ցանկացած կոալիցիա մենք մտել ենք նույն պայմաններով եւ դուրս ենք եկել այն ժամանակ, երբ մեր գաղափարներն անտեսվել են»,-հայտարարել է Ռուստամյանը:
Նշենք, որ ՀՅԴ-ն կողմ է հանդես գալիս աստիճանաբար խորհրդարանական կառավարման համակարգի անցնելուն:
