Եվրամիության երկրներում կա հստակ պահանջ. բոլոր օդաչուները առնվազն տարին մեկ անգամ պետք է հետազոտվեն, իսկ որոշակի տարիքից հետո՝ կես տարին մեկ անգամ։ Այս մասին լրագրողներին հայտարարել է Եվրամիության նախագահը, գրում է «ՌԻԱ Նովոստի»-ն։
ԵՄ նախագահի խոսքով՝ օդաչուներին շատ հստակ բժշկական պահանջներ են ներկայացվում, այդ թվում՝ հոգեբանական եւ հոգեբուժական։
Հիշեցնենք, որ Բարսելոնից Դյուսելդորֆ չվերթ իրականացնող Germanwings ավիաընկերության Airbus A320 ինքնաթիռը մարտի 24-ին կործանվել էր Ֆրանսիական Ալպերի դժվարամատչելի տեղանքում։ Վթարից զոհվել էր 150 մարդ։
Մարսելի դատախազ Բրիս Ռոբենը հայտարարել էր, որ Ֆրանսիայում կործանված Airbus А320 օդանավի երկրորդ օդաչուի գործողությունները կարելի է գնահատել որպես ինքնաթիռը կործանելու մտադրություն։
Ռոբենի խոսքով՝ թռիչքի առաջին 20 րոպեների ընթացքում օդաչուները նորմալ զրույց են վարել։ Երբ օդանավի հրամանատարը դուրս է եկել խցիկից, ենթադրաբար զուգարան, երկրորդ օդաչուն փակել է դուռը եւ սկսել է իջեցնել օդանավը։
Հրամանատարը փորձել է վերադառնալ խցիկ, սակայն չի կարողացել։ Ինքձայնագրիչից դուրս բերված գրառումներում լսվում են դուռը ջարդելու փորձեր եւ դիսպետչերի կանչը, որը զգուշացրել է հնարավոր բախման մասին։ Երկրորդ օդաչուն ոչ մի ձայն չի հանել, սակայն նրա կանոնավոր շնչառությունը լսվում էր ընդհուպ մինչեւ վթարի պահը։