Համաշխարհային տնտեսությունը թմրանյութերի ապօրինի շրջանառությունից տարեկան 1 տրլն դոլար է ստանում։  Նման հայտարարություն է արել ՌԴ Թմրանյութերի շրջանառության վերահսկողության դաշնային ծառայության պետի տեղակալ Վլադիմիր Կալանդան, գրում է «ՌԻԱ Նովոստի»-ն։

Նա նշել է, որ ՄԱԿ-ի տվյալներով՝ 2008թ. ֆինանսական ճգնաժամի տարիներին աշխարհի խոշորագույն բանկերում իրացվելիության անհրաժեշտ մակարդակը պահպանելու նպատակով ներդրվել է ավելի քան 452 մլրդ թմրադոլար։ Կալանդայի կարծիքով՝ թմրանյութերի վաճառքից ստացվող գումարների ընդունման համար բանկերը էլեկտրոնային վճարումների համակարգ են օգտագործում։ 

Կալանդան նաեւ նշել է, որ թմրանյութերի շրջանառության հետ կապված ստվերային սեկտորը բավական օպերատիվ է արձագանքում նորարարություններին, որոնք նպաստում են տնտեսական հարաբերությունների զարգացմանը։ Նրա խոսքով՝ համացանցում թմրանյութերի վաճառքն ավելի հին պրակտիկա ունի, քան մնացած ապրանքներինը։

Կալանադան նշել է, որ պետությունները պետք է միավորվեն թմրագումարների հոսքը տնտեսության իրական սեկտոր ուղղելու եւ ֆինանսական ոլորտի քրեականացման դեմ պայքարելու համար։