Հայաստանի Սփյուռքի փոխնախարար Ստեփան Պետրոսյանը Ջավախքում հայապահպանության հետ կապված խնդիրները լուծելու հեշտ ու ամենակարեւորը ֆինանսներ չպահանջող ձեւ է գտել: Նա կոչ է անում հայ գործարարներին ներդրումներ կատարել Ջավախքում: «Մենք ակտիվ մասնակցում ենք Ջավախքում տեղի ունեցող մշակութային բոլոր միջոցառումներին։ Փորձում ենք մեր գործարարներին, այդ թվում նաև սփյուռքահայ գործարարներին հորդորել, որպեսզի նրանք ներդրումներ կատարեն նաև Ջավախքում, որովհետև այնտեղ հիմնական խնդիրը մարդկանց աշխատանքով ապահովելն է, հիմնականում տնտեսական խնդիրն է. այնտեղ հայապահպանության խնդիր չկա, կա հայաթափության խնդիր»- ասել է նա, հավելելով, որ նախարարությունն աշխատում է իր բոլոր ծրագրերում ներգրավել Ջավախքի հայ երիտասարդությանը և ողջ ջավախահայությանը։ Նախարարությունը հարց է բարձրացրել, որ ջավախահայ երիտասարդների համար, ովքեր գալիս են Հայաստանում սովորելու, ուսման վարձը հավասարեցվի ՀՀ քաղաքացի հանդիսացող երիտասարդների ուսման վարձին։
Ինչ վերաբերում է հայկական դասագրքերի՝ Վրաստան մուտքն արգելելուն, Ս.Պետրոսյանը ընդգծել է . «Մինչև հիմա մենք նման խնդիր չենք ունեցել, սակայն վերջերս վրացական իշխանությունները թույլ չեն տալիս, որ Հայաստանում տպագրված դասագրքերը հասնեն այդ տարածաշրջանի հայկական դպրոցներին։ Սփյուռքի նախարարությունն այդ հարցը բարձրացրել է, այդ մասին տեղյակ է մեր կրթության նախարարությունը, ինչպես նաև մեր արտգործնախարարը։ Հարցը վերաբերում է միջպետական հարաբերություններին, և այստեղ Սփյուռքի նախարարությունը պետք է համագործակցի մյուս նախարարությունների, այդ թվում նաև՝ ԱԳ նախարարության հետ։ Հուսով ենք, որ հարցն ինչ-որ լուծում կստանա։ Վրաստանում ընդհանրապես գրաքննություն չկա, և մենք չենք հասկանում, թե ինչ է նշանակում արգելել հայկական դասագրքերի մուտքը»:
