Եվրամիությունը Հայաստանի հետ համագործակցության շարունակություն է ակնկալում: Այս մասին NEWS.am-ի թղթակցի հետ զրույցում հայտարարեց Լեհաստանի Սեյմի պատգամավոր, ԵԽԽՎ-ում լեհական պատվիրակության անդամ Քշիշտոֆ Շչերսկին՝ մեկնաբանելով մայիսի 21-22-ը Ռիգայում նախանշված Արեւելյան գործընկերության գագաթաժողովը:
Պատասխանելով հարցին, գագաթաժողովի արդյունքում կարո՞ղ են, արդյոք, Հայաստանն ու Եվրամիությունը համագործակցության նոր ձեւաչափի հասնել, պատգամավորը պատասխանեց. «Կարծում եմ՝ Եվրոպան դրան է սպասում: Սպասում է, որ Հայաստանը ներառվի գործընթացներում, որոնք, ի դեպ, ուղղված չեն Ռուսաստանի դեմ: Այդ գործընթացները պետությունը նաեւ ներսից բարեփոխելու համար են: Չափանիշներին համապատասխանելու գործընթացներ, որոնք Եվրոպայում երաշխավորում են օրենքի գերակայությունը, ժողովրդավարությունն ու մարդու իրավունքները: Եվրոպան նման դինամիկա է ակնկալում նաեւ Հայաստանից»:
Հարցին, համագործակցության ինչպիսի՞ ձեւաչափեր կարող են լինել Եվրասիական տնտեսական միությանը Հայաստանի անդամակցությունից հետո, լեհ պատգամավորը պատասխանեց. «Մենք, իհարկե, հարգում ենք Հայաստանի ինքնիշխան ընտրությունը, որը չընտրեց ԵՄ-ի հետ ամենախորը համագործակցության ձեւաչափը: Ամեն դեպքում, քաղաքական եւ տնտեսական համագործակցության զարգացումը հնարավոր է: Խնդիրն այն է, որ ազատ առեւտրի գոտու հեռանկարի մասին խոսք անգամ լինել չի կարող: Սակայն կարելի է խոսել միջանկյալ տարբերակների մասին, եւ կողմերը պետք է ընտրեն դրանք»:
