Մայիսի 20-ին Լեհաստանում ՀՀ դեսպան Էդգար Ղազարյանը հանդիպում ունեցավ Լեհաստանի Սենատի արտաքին հարաբերությունների հանձնաժողովի նախագահ Վուոդժիմիերժ Չիմոշեւիչի հետ:
ԱԳՆ մամուլի ծառայությունից հայտնում են, թե քննարկվեց հայ-լեհական հարաբերություններին առնչվող հարցերի լայն շրջանակ: Դեսպան Ղազարյանը շնորհակալություն հայտնեց Վուոդժիմիերժ Չիմոշեւիչին` 2005թ. Լեհաստանի կողմից Հայոց ցեղասպանությունը ճանաչող եւ դատապարտող բանաձեւի ընդունման եւ այդ հարցում նրա ցուցաբերած աջակցության համար: Դեսպանը Սենատի արտաքին հարաբերությունների հանձնաժողովի նախագահին ներկայացրեց Հայաստանի արտաքին քաղաքականության հիմնական ուղղությունները:
Լեհաստանի Սենատի արտաքին հարաբերությունների հանձնաժողովի նախագահը նշեց, որ Հայաստանը մշտապես եղել եւ մնում է Լեհաստանի համար բարեկամ երկիր, որի հետ ինչպես տնտեսական, այնպես էլ մյուս բոլոր բնագավառներում համագործակցության զարգացումը բխում է Լեհաստանի շահերից՝ արտահայտելով լեհ ժողովրդի դրական վերաբերմունքը հայերի հանդեպ: Նա կարծիք հայտնեց, որ Հայաստանը կարող է գրավիչ լինել Լեհաստանի ներդրողների համար՝ կարեւորելով հատկապես տնտեսական բնագավառում համագործակցության զարգացումը:
Զրուցակիցներն անդրադարձան նաեւ Արեւելյան գործընկերության շրջանակներում Հայաստան - Եվրամիություն համագործակցության հեռանկարներին: