«Արեւելյան գործընկերության» Ռիգայի գագաթնաժողովի կողմերը նոր փաստաթղթի շուրջ դեռեւս փոխզիջման չեն եկել։ Հայտարարության տեքստը վերջնական տեսքով կհայտնվի մայիսի 22-ին, գրում է ՏԱՍՍ-ը՝ վկայակոչելով իր դիվանագիտական աղբյուրները։
«Ղրիմին վերաբերող ձեւակերպումից բացի կան նաեւ այլ տարաձայնություններ այս կամ այն մասնակցի անդամակցության հնարավորության եւ դիրքին վերաբերող հարցերում։ Խնդրանք է հնչել փաստաթղթում ամրագրել ԵՄ-ին անդամակցելու հնարավորությունը»,- ասել է գործակալության զրուցակիցը։
Հարցին, թե փաստաթղթի տեքստը վերջնական կներկայացվի՞, նա պատասխանել է. «Բնականաբար, հռչակագիրը կընդունվի։ Այն պետք է փոխզիջումային լինի, այնպես որ աշխատում ենք»։
Ավելի վաղ Հայաստանն ու Բելառուսը Ռիգայի գագաթնաժողովում հրաժարվել են ստորագրել ԵՄ ներկայացուցիչների պատրաստած «Արեւելյան գործընկերության» հայտարարության տեքստը, որում խոսվում է Ռուսաստանի կողմից Ղրիմը անեքսիայի ենթարկելու մասին։
