Վրացական իշխանությունները թույլ չեն տվել ջավախքահայ քաղաքական ակտիվիատ Վահագն Չախալյանի հայ փաստաբանին այցելել իր պաշտպանյալին:
«Երկիր» միության տարածած հայտարարության մեջ մասնավորապես նշվում է, որ 2009թ. օգոստոսի 17-ին ջավախքահայ քաղաքական ակտիվիստ Վահագն Չախալյանի հայ փաստաբան Ստեփան Ոսկանյանը փորձել է այցելել իր պաշտպանյալին, որը պահվում է Վրաստանի Ռուսթավիի քաղաքի համար 2 գաղութում: Սակայն գաղութի ղեկավարությունը հրաժարվել է թույլ տալ տեսակցոությունը` պատճառաբանելով, որ այն փաստաթղթերը, որով հայ փաստաբանի նախկինում իրավունք ուներ հանդիպելու Վահագն Չախալյանի հետ, այլեւս անվավեր են:
Նույն օրը Ստեփան Ոսկանյանը դիմել է Վրաստանի հանրային պաշտպանի գրասենյակ, որի աշխատակիցները, ուսումնասիրելով փաստաբանի փաստաթղթերը, գաղութի ղեկավարության որոշումը գնահատել են որպես ամբողջովին անհիմն: Իր պաշտպանյալի հետ տեսակցությունը թույլ չտալու փաստի առնչությամբ Ստեփան Ոսկանյանը նաեւ ներկայացրել է գրավոր բողոք` ուղղված Վրաստանի հանրային պաշտպանին եւ Ռուսթավիի գաղութի ղեկավարությանը:
«Երկիր» միությունը գնահատում է Վահագն Չախալյանի հետ փաստաբանի տեսակցությունն արգելելու որոշումը որպես վրացական իշխանությունների կողմից ջավախքահայ քաղաքական ակտիվիստի տարրական իրավունքների հերթական խայտառակ խախտում, որի նպատակն է խոչընդոտել Չախալյանի գործով ս.թ. սեպտեմբերի18-ին կայանալիք դատալսմանը լիարժեք նախապատրաստվելը: Վրացական իշխանությունները նշված քայլով նաեւ նպատակ են հետապնդում էապես դժվարացնել Վահագն Չախալյանի հայկական ԶԼՄ-ներից տեղեկատվություն ստանալու հնարավորությունը, որը ապահովում էր հայ փաստաբանը",- նշել է միությունն ու հավելել. «Հաշվի առնելով վերոնշյալը` „Երկիր“ միությունը կոչ է անում Վրաստանի հանրային պաշտպան Սոզար Սուբարիին, միջազգային իրավապաշտպան կազմակերպություններին, Վրաստանում հավատարմագրված միջազգային կառույցներին եւ դիվանագիտական ներկայացչություններին` համապատասխան գնահատական տալ վրացական իշխանությունների հերթական խայտառակ խախտմանը, ինչպես նաեւ վերացնել դրա հետեւանքները` ապահովելով հետագայում փաստաբանի անարգել մուտքը իր պաշտպանյալի մոտ»: