![](img/news/27/45/05/default.jpg)
Բաղրամյան պողոտայում ընդդեմ էլեկտրաէներգիայի նստացույցը շարունակվում է, երբեմն-երբեմն սադրանքներ եւ միջադեպեր են գրանցվում։
Ակցիայի նոր նախաձեռնող խմբի անդամները քիչ առաջ մոտեցել են տարածքում կանգնած փոխոստիկանապետ Սամվել Հովհաննիսյանին եւ հայտնել են, որ չորս անսթափ անձինք մտել են նստացույցի տարածք, վեճեր են հրահրում ցուցարարների հետ, փորձում կռիվ հրահրել։
Տարածքում հասարակական կարգը հսկելուն կոչված փոխոստիկանապետը ցուցարարներին ասաց, թե գործողություն ձեռնարկելու համար նրանք պետք է գան բաժին, դիմում ներկայացնեն եւ հայտնեն, թե ովքեր են խախտում հասարակական կարգը։ Նոր դրանից հետո իրենք կարող են խումբ ուղարկել։
Այս պահին ցուցարարները քննարկում են՝ ինչպես վարվեն։
Նշենք, որ պողոտայում պարբերաբար լինում են մանր միջադեպեր, որոնք արագորեն հարթվում են։
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: