![](img/news/27/55/51/default.jpg)
«Հայաստանի Էլեկտրական Ցանցեր» ՓԲԸ-ի գլխավոր տնօրեն Եվգենի Բիբինը վերադարձել է Հայաստան եւ այսօր արդեն աշխատանքի է: Այս մասին NEWS.am-ի թղթակցին հայտնեցին ՀԷՑ լրատվական ծառայությունից:
Մեզ հայտնեցին, որ երեւի շաբաթվա վերջին ինչ-որ նորություն կլինի անցկացվելիք աուդիտի հետ կապված, այժմ աշխատում են տեխնիկական առաջադրանքի վրա, որը պետք է տան աուդիտոր ընկերությանը:
Ինչ վերաբերում է Հանրային ծառայությունները կարգավորող հանձնաժողովի կողմից ՀԷՑ-ին տուգանելուն, մեզ փոխանցեցին, որ իրենց տուգանում են, քանի որ ներդրումային ծրագրով չեն աշխատել եւ նոր միացումներ էլ չեն արել: «Երբ ներդրումային ծրագիրը պետք է հաստատվեր, Բիբինը ասաց, որ ելնելով ֆինանսական վիճակից՝ խնդրում ենք հետաձգել: 2015թ ներդրումային ծրագիրը դեռ հաստատված չէ, առաջիկա օրերին կհաստատվի, միացումները, որոնց համար տուգանում են մեզ, ներդրումային ծրագրի մասին են կազմում»,-հայտնեցին ՀԷՑ լրատվականից:
Նշենք, որ հուլիսի 8-ին նիստ է գումարելու, որի ընթացքում քննարկելու են «Հայաստանի էլեկտրական ցանցեր» ընկերությանը տուգանքներ նշանակելու նախագծերը։ ՀԾԿՀ նիստում քննարկելու են 21 հարց, որոնցից 14-ը վերաբերում է ՀԷՑ-ին տուգանքներ նշանակելուն։ 13 որոշումներով ընկերությունը տուգանվելու է 5-ական միլիոն դրամով, մի որոշմամբ՝ 10 մլն դրամով։ Ընդհանուր առմամբ, առաջարկվում է ՀԷՑ-ին տուգանել 75 մլն դրամ։
Ըստ նախագծերի, ՀԷՑ-ը խախտել է ժամկետները, թե երբ պետք է քաղաքացու սպառման համակարգը միացնի էլեկտրական ցանցին, ինչպես նաև նոր սպառողների սպառման համակարգն էլեկտրական ցանցին միացնելիս, պատճառաբանելով, որ ընկերությունը գտնվում է ծանր ֆինանսատնտեսական վիճակում, դիմողից միացման վճարից բացի պահանջել է նաև սպառման համակարգն էլեկտրական ցանցին միացնելու համար փաստացի ծախսումների գումարը՝ նշված գումարը հետագա 5 տարիների ընթացքում սպառված էլեկտրաէներգիայի դիմաց վճարների հաշվին մարելու պայմանով:
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: