«Հայաստանի էլեկտրական ցանցեր» ընկերությունը չի նախատեսում սնանկացման գործընթաց սկսել: Այս մասին, այսօր՝ հուլիսի 8-ին, լրագրողների հետ զրույցում նշեց ՀԷՑ-ի մամուլի քարտուղար Նատալյա Սարջանյանը:
«Նման բանի մասին «ՀԷՑ»-ը չի մտածում»,-ասել է նա:
Անդրադառնալով ընկերության աուդիտի խնդրին, Սարջանյանն ասաց, որ հիմա տեխնիկական աշխատանքներ են ընթանում աուդիտին պատրաստվելու համար, աշխատանքներն իրականացնում են ՀՀ կառավարությունն ու ՀԷՑ-ի սեփականատեր ռուսական «Ինտեռ ՌԱՕ» ընկերությունը: Դրանից հետո աուդիտոր ընկերության ընտրության մրցույթ կհայտարարվի: «Դեռեւս վաղ է հայտարարել, թե դա երբ կլինի: Իսկ աուդիտը, ինչպես հաղորդվել է ավելի վաղ, կարող է տեւել 3-6 ամիս»,-հայտարարեց մամուլի քարտուղարը:
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
