Հայաստանի գազալցակայաններում շարունակվում են ստուգումները, իսկ դրանցում պայթյունների պատճառն այն է, որ գազը թույլատրվածից շատ են լցնում։ Այս մասին հուլիսի 8-ին՝ Կառավարության նիստից հետո, լրագրողներին հայտարարեց ՏԿԱԻՆ ղեկավար Արմեն Երիցյանը։
Նրա խոսքով՝ Հայաստանում մեքենաների 60-70 տոկոսը գազով է աշխատում, ուստի գազի հետ խնդիրներ են առաջանում։ «Աշխատակիցները նախատեսվածից շատ են գազ լցնում, որպեսզի հաճախորդներին գրավեն։ Այդ պատճառով 196-ի փոխարեն նրանք 220-250 գազ են լցնում։ Ստուգումները շարունակվում են, որոշ լցակայաններ տուգանվել են»,- ասաց Երիցյանը։
Այն դիտարկմանը, թե գազալցակայաններից շատերը պատկանում են վարչապետ Հովիկ Աբրահամյանին եւ գործարար Գագիկ Ծառուկյանին, Երիցյանը պատասխանեց, որ իրենք ստուգում են անխտիր բոլոր գազալցակայանները։ «Ինչ վերաբերում է Գագիկ Ծառուկյանին կամ Հովիկ Աբրահամյանին, ես գիտեմ, որ իմ վարչապետը գազալցակայան չունի։ Միգուցե Ծառուկյանն ունի, բայց դա ինձ չի հետաքրքրում»,- եզրափակեց Երիցյանը։