Իրանի միջուկային ծրագրի շուրջ բանակցություններում հաջողությունը մասամբ կախված է այն հանգամանքից, թե ինչ տեղի կունենա Մերձավոր Արեւելքում՝ կապված «Իսլամական պետություն» խմբավորման հետ: Այս մասին NEWS.am-ի թղթակցի հետ զրույցում հայտարարեց ռուսաստանցի հայտնի փորձագետ, իրանագետ Կարինե Գեւորգյանը:
Նրա խոսքով, չի բացառվում, որ բանակցությունները կրկին կերկարաձգվեն: Անդրադառնալով վերջնական համաձայնության հասնելու ճանապարհին հիմնական խոչընդոտներին՝ Կարինե Գեւորգյանն ընդգծեց. «Այստեղ առկա է Սաուդյան Արաբիայի, Իսրայելի, նույն Ֆրանսիայի լոբբինգը: Նրանք փորձում են արգելակել բանակցությունների գործընթացը»:
Բանակցությունների ընթացքում վերջին շրջանում առաջացած նոր նրբությունների մասին հարցին ի պատասխան՝ Կարինե Գեւորգյանը նշեց. «Ես տեսնում եմ, որ Ռուսաստանի դիրքորոշումը բավականաչափ ակտիվ եւ բաց է այն առումով, որ ՌԴ-ն բարձրաձայնում է պատժամիջոցները վերացնելու անհրաժեշտության մասին՝ կապված Իրանին զենքի մատակարարման անհրաժեշտության հետ»:
Հիշեցնենք, որ Իրանի եւ «վեցյակի» (ՄԱԿ-ի ԱԽ մշտական անդամներ եւ Գերմանիա) միջեւ ժամանակավոր համաձայնագրի գործողության ժամկետը երկարաձգվել է մինչեւ հուլիսի 10-ը:
