![](img/news/27/60/32/default.jpg)
Իսրայելի խորհրդարանի խոսնակ Յուլի Էդելշտեյնը կոչ է արել ճանաչել Հայոց ցեղասպանությունը։
Սպորտի, մշակույթի եւ կրթության հարցերով հանձնաժողովի նիստում Էդելշտեյնը հայտարարել է, որ ակնկալում է, որ ինքն ու Քնեսեթը համապատասխան կերպով կգործեն, որպեսզի հնարավոր լինի որոշում կայացնել՝ ժողովրդավար երկրի բարոյական չափանիշներին համապատասխան։
Նա ընդգծել է, որ շատ երկրներ չեն ճանաչում Հայոց ցեղասպանությունը, սակայն դա անում են խորհրդարանները, հայտնում է Jerusalem Post-ը։ «Ես կաշխատեմ առաջ մղել այդ հարցը եւ հույս ունեմ, որ Քնեսեթի անդամները կքայլեն ճիշտ ուղղությամբ եւ կքվեարկեն, երբ գա ճշմարտության պահը»,- հայտարարել է նա։
Իր հերթին հանձնաժողովի նախագահ Յակով Մարգին նույնպես կոչ է արել Իսրայելի կառավարությանը ճանաչել Հայոց ցեղասպանությունը։
Նրա կարծիքը պաշտպանել են Քնեսեթի անդամներ Զահավա Գալիոնը եւ Նահման Շայը, որոնք կազմակերպել են հանդիպումը։ Շայը նշել է, որ Իսրայելը պետք է ճանաչի այն, ինչ կատարվել է հայերի հետ։ «Ոչինչ չի փոխվի Թուրքիայի եւ Ադրբեջանի հետ մեր հարաբերություններում»,- հավելել է նա։
Իսրայելի ԱԳՆ ներկայացուցիչ Օդեդ Յուզեֆը նշել է, որ Իսրայելը համագործակցում է Հայաստանի հետ շատ նախագծերով, սակայն միջազգային քննարկումներն այն մասին, թե արդյոք կատարվածը ցեղասպանություն է եղել, թե ոչ, քաղաքական բնույթ են կրում եւ վերաբերում են իմաստաբանությանը։