Վերջին անգամ «Ռոսնեֆթ»-ի ներկայացուցիչները «Նաիրիտ»-ում 1.5-2 տարի առաջ են եղել: Այս մասին NEWS.am-ի թղթակցի հետ զրույցում հայտարարեց «Նաիրիտ գործարան» ՓԲԸ տնօրեն Ռուբեն Սաղաթելյանը:

Գործարան չեն այցելում նաեւ ռուսական քիմիական մյուս կոնցեռնի՝ «Իտեռա»-ի ներկայացուցիչները, որոնք նախկինում նույնպես հնարավոր ներդրող էին ներկայացվում: «Նրանք «Ռոսնեֆթ»-ից առաջ էին»,- հիշեցրեց Սաղաթելյանը՝ հավելելով. «Շահագրգիռ ներդրողներ, որոնք կուսումնասիրեին գործարանը, ներկայում չկան»:

Հիշեցնենք, 2012 թվականի փետրվարին NEWS.am-ը տեղեկացրեց, որ ռուսական «Իտեռա» հոլդինգը պատրաստվում էր «Նաիրիտ»-ին օգնել ինժեներային ընկերություն գտնել՝ համակողմանի աուդիտ անցկացնելու համար: 2011 թվականի հոկտեմբերին հոլդինգի աշխատանքային խումբը եկավ «Նաիրիտ»:

Իսկ 2014-ի փետրվարի վերջին Հայաստանի այն ժամանակվա վարչապետ Տիգրան Սարգսյանը հայտարարեց, որ ՌԴ-ի իր գործընկեր Դմիտրի Մեդվեդեւի հետ հանդիպման ժամանակ ներկայացվել է «Ռոսնեֆթ»-ի նախագահ Իգոր Սեչինի հաշվետվությունը, որը պատրաստակամություն էր հայտնել Հայաստանում շուրջ 500 մլն դոլար ներդնել՝ «Նաիրիտ»-ի հիման վրա գործարան կառուցելու նպատակով:

Հիշեցնենք, որ 2006թ. պետությունը «Նաիրիտ»-ի բաժնեմասերի 90%-ը 40 մլն դոլարով վաճառել էր բրիտանական Rhinoville Property Limited կոնսորցիումին։ ԱՊՀ Միջպետական բանկը 2006-ին Rhinoville Property Limited ընկերության համար 70 միլիոն դոլարի բանկային գիծ էր բացել, որը ընկերությունը չէր փակել։ Մոսկվայի արբիտրաժային դատարանը 2014թ. հունվարին բավարարել էր Միջպետական բանկի մասին հայցը` հայկական «Նաիրիտ» գործարանի սեփականատիրոջից պարտքեր դիմաց 90% բաժնեմասերը բռնագրավելու հայցը։ Մնացած 10%-ը պատկանում է Հայաստանի կառավարությանը։