«Շենգավիթ» բժշկական կենտրոնի մանկաբարձ-գինեկոլոգ Շուշանիկ Բախշյանը չի ցանկանում մեկնաբանել կարծիքները, թե «Շենգավիթ» բժշկական կենտրոնից հուլիսի 27-ին «Էրեբունի» ԲԿ տեղափոխված եւ երկու օր անց մահացած 26-ամյա ծննդկան Մերի Մարգարյանի մահվան մեջ ինքն է մեղավոր:

NEWS.am-ի թղթակցի հետ զրույցում Շուշանիկ Բախշյանը մասնավորապես ասաց.« Ես միայն մեկ նախադասություն կասեմ. ես հիմա խորը ցավում եմ Մերիի մահվան համար եւ ցավակցում եմ իր հարազատներին: Հիմա նախաքննություն է ընթանում, փորձաքննություններ են նշանակվել, կլինի մասնագիտական եզրակացություն, դրանից հետո եթե մեղավորներ կան, նրանք կպատժվեն, այդքան բան»:

Բժշկուհու խոսքով՝ ինքն արդեն 20 տարի է մանկաբարձ-գինեկոլոգ է, եւ առաջին անգամ է նման դեպք պատահում: Այլ հարցերի Շուշանիկ Բախշյանը հրաժարվեց պատասխանել:

Հիշեցնենք, որ Մերի Մարգարյանի հարազատները կատարվածի մեջ մեղադրում են «Շենգավիթ» բժշկական կենտրոնի բժշկուհի Շուշանիկ Բախշյանին, ում մոտ էլ հաշվառված է եղել եւ 35 շաբաթ հետազոտվել է 26-ամյա կինը: Մերի Մարգարյանի եղբոր պատմելով՝ քույրը 4 օր շարունակ բարձր ջերմություն է ունեցել, սակայն բժշկուհին հրաժարվել է հոսպիտալացնել: Միայն հուլիսի 26-ին են նրան հիվանդանոց ընդունել, սակայն հաջորդ օրն արդեն իսկ խորհուրդ են տվել տեղափոխել այլ հիվանդանոց: Հարազատները տեղափոխել են «Էրեբունի» ԲԿ, որտեղ նրան անմիջապես կեսարյան հատում են արել: 2 օր անց, սակայն, նա մահացել է: Հուլիսի 30-ին կեսօրին մահացել է նաեւ ծննդկանի նորածին դուստրը:

Դեպքի առթիվ նյութեր են նախապատրաստվում: