Վարչապետ Հովիկ Աբրահամյանն ընդունել է Հայաստանում Գերմանիայի Դաշնային Հանրապետության նորանշանակ արտակարգ եւ լիազոր դեսպան Բերնհարդ Մաթիաս Քիսլերին:
Վարչապետը շնորհավորել է դեսպանին նոր պաշտոնում նշանակվելու առթիվ եւ մաղթել արդյունավետ ու բեղմնավոր աշխատանք: Հովիկ Աբրահամյանը վստահություն է հայտնել, որ պարոն Քիսլերի գործունեությունը կնպաստի Հայաստանի եւ Գերմանիայի միջեւ քաղաքական, տնտեսական հարաբերությունների հետագա սերտացմանն ու ամրապնդմանը: Վարչապետը նշել է, որ առկա է տնտեսական կապերի զարգացման լուրջ ներուժ եւ դրա իրացման գործում կարեւորել հայ-գերմանական միջկառավարական հանձնաժողովի ակտիվ աշխատանքը: Հովիկ Աբրահամյանն ընդգծել է, որ ՀՀ կառավարությունը պատրաստ է աջակցել երկու երկրների եւ ժողովուրդների շահերից բխող յուրաքանչյուր նախաձեռնության իրականացման:
Շնորհակալություն հայտնեով ջերմ ընդունելության համար՝ Մաթիաս Քիսլերը վստահեցրել է, որ կներդնի առավելագույն ջանքեր՝ ի նպաստ երկու պետությունների միջեւ բազմաոլորտ համագործակցության խորացման եւ ընդլայնման: Դեսպանն արդյունավետ է գնահատել Հայաստանի եւ Գերմանիայի միջեւ ձեւավորված փոխգործակցությունը մի շարք բնագավառներում, այդ թվում տնտեսական, էներգետիկ, հումանիտար եւ այլն:
Հանդիպման ընթացքում զրուցակիցները քննարկել են նաեւ ՀՀ-ԵՄ հարաբերություններին, մեր երկրում իրականացվող սահմանադրական բարեփոխումներին առնչվող հարցեր:
