Գյումրիում Ավետիսյանների ընտանիքի սպանությունից հետո քաղաքում տեղի ունեցած բողոքի ակցիայի մասնակիցների եւ ոստիկանների միջեւ բախումների գործով նոր փորձաքննություն է նշանակվել: Այս մասին NEWS.am-ի թղթակցի հետ զրույցում ասաց գործով մեղադրյալներից Մնացական Ալեքսանյանի փաստաբան Հայկ Հարությունյանը՝ ավելացնելով, որ գործն անիմաստ ձգձգում են:
«էս վերջերս մեզ կանչել, ինչ-որ նոր փորձաքննությունների են ծանոթացրել, ասել են՝ գործն ընթացքի մեջ է սպասում են այդ փորձաքննությունների պատասխանին: Էդ տեղանքից ինչ-որ քարեր էին գտել, ուղարկել են, տեսնեն՝ որտեղի քար է, պետավտոտեսուչների ավտոմեքենաների վնասվածքներն են ուսումնասիրում: Ճիշտն ասած՝ իմաստն էլ չեմ հասկանում, ուղղակի անիմաստ ձգձգում են, մինչեւ տեսնեն՝ ինչ անեն:
Նշենք, որ մեղադրյալների թիվը պաշտոնապես չեն հայտնում: NEWS.am-ին, սակայն, մեղադրյալներից Մնացական Ալեքսանյանի փաստաբան Հայկ Հարությունյանը, հայտնել է, որ նրանց թիվը 19-ն է:
Ի դեպ, մեղադրյալներից 3-ի անունն է հայտնի՝ Մնացական Ալեքսանյան, Անուշավան Հարությունյան եւ անչափահաս Սամվել Սարգսյան:
Հիշեցնենք, որ բախումները տեղի էին ունեցել 2015թ. հունվարի 15-ին Գյումրիում ՌԴ հյուպատոսարանի շենքի առջեւ ոստիկանների եւ ցուցարարների միջեւ: Բախումներից հետո Գյումրիի հիվանդանոց էր դիմել 33 անձ, որոնցից 23-ը ոստիկան:
Բողոքի ակցիայի մասնակիցները պահանջում էին Հայաստանին հանձնել Գյումրիում հունվարի 12-ին Ավետիսյանների ընտանիքի 7 անդամներին սպանելու համար մեղադրվող Վալերի Պերմյակովին:
